1. ‘Ia ‘outou vivi‘i atu i le ALI‘I.Vivi‘i atu ia ‘outou i le suafa o le ALI‘I;o ‘outou ‘au‘auna a le ALI‘I,vivi‘i atu ia ‘outou ‘iā te ia.
2. ‘Outou o ē tutū i le fale o le ALI‘I,i lotoā o le fale o lo tatou Atua.
3. ‘Ia ‘outou vivi‘i atu i le ALI‘I; auā e lelei le ALI‘I,‘ia fai pesega i lona suafa; auā e matagofie lea.
4. Auā ‘ua filifilia Iakopo e le ALI‘I mōna,o Isaraelu e fai māna ‘oloa tāua.
5. Auā o a‘u nei, ‘ua ‘ou iloa e sili lava le ALI‘I,e sili fo‘i lo tatou Ali‘i i atua uma lava.
6. O mea uma lava e finagalo i ai le ALI‘I,e faia lava e ia i le lagi ‘atoa ma le lalolagi,o le sami ma mea loloto uma lava.
7. E ‘ava‘e e ia o ‘ausa mai tulu‘iga o le lalolagi;na te faia le uila ‘atoa ma le timu;na te ‘aumaia le matagi mai mea e teu ai ana ‘oloa.
8. O lē na fasia ulumatua a Aikupito,o tagata ‘atoa ma manu.
9. O lē na ‘auina atu o fa‘ailoga ma vāvega‘iā te oe, Aikupito e,‘iā Farao ma ana ‘au‘auna uma lava.
10. O lē na fasia nu‘u tetele,ma na fasiotia o tupu malolosi.
11. O Sekono le tupu o sa Amorī ma Oko le tupu o Vasana,‘atoa ma tupu uma o Kanana.
12. ‘Ua na avatu fo‘i lo latou lau‘ele‘ele ma tofi,o le tofi lava o lona nu‘u o Isaraelu.
13. Le ALI‘I e,e fa‘avavau lava lou suafa;o le fa‘amanatuga ‘iā te oe,le ALI‘I e, e au tupulaga lea.
14. Auā e fa‘amasino e le ALI‘I lona nu‘u;e salamō fo‘i ia ‘ona o ana ‘au‘auna.
15. O tupua o nu‘u ‘ese, o ario ma auro ia,o galuega a lima o tagata.
16. E fai o latou gutu, ‘ae lē gagana mai;e fai o latou mata, ‘ae lē va‘ai.
17. E fai o latou taliga, ‘ae lē fa‘alogo;e leai fo‘i se mānava i o latou gutu.
18. O ē faia ia mea ‘ua tutusa lava ma i latou,o i latou uma o ē fa‘atuatua i ai.
19. Le ‘āiga o Isaraelu e, ‘ia ‘outou fa‘amanū atu i le ALI‘I;le ‘āiga o Arona e, ‘ia ‘outou fa‘amanū atu i le ALI‘I.
20. Le ‘āiga o Levi e, ‘ia ‘outou fa‘amanū atu i le ALI‘I;‘outou o ē matata‘u i le ALI‘I, ‘inā fa‘amanū atu ia i le ALI‘I.
21. ‘Ia fa‘amanū atu i le ALI‘I mai Siona,o lē e afio i Ierusalema.‘Ia ‘outou vivi‘i atu i le ALI‘I.