8. Uyakuloba ematsheni onke amazwi alo mthetho, uwaqophisise kahle.”
9. UMose nabapristi bamaLevi bakhuluma kuwo wonke u-Israyeli, bathi: “Thula, ulalele, Israyeli: namuhla sewuyisizwe sikaJehova uNkulunkulu wakho.
10. Ngalokho wolilalela izwi likaJehova uNkulunkulu wakho, wenze imiyalo yakhe nezimiso zakhe engikuyala ngakho namuhla.”
11. UMose wayala abantu ngalona lolo suku, wathi:
12. “Laba bayakuma entabeni yaseGerizimu ukubusisa abantu, lapho seniwelile iJordani: oSimeyoni, noLevi, noJuda, no-Isakare, noJosefa, noBenjamini;
13. laba bayakuma entabeni yase-Ebali babe ngabokuqalekisa: oRubeni, noGadi, no-Asheri, noZebuloni, noDani, noNafetali.
14. “AmaLevi ayakuphendula, athi kuwo onke amadoda akwa-Israyeli ngezwi elikhulu:
15. “ ‘Makaqalekiswe umuntu owenza isithombe ezibaziweyo nesibunjiweyo, isinengiso kuJehova, umsebenzi wezandla zengcweti, asimise ngasese.’“Bonke abantu bayakuphendula bathi: ‘Amen.’
16. “ ‘Makaqalekiswe odelela uyise noma unina.’“Bonke abantu bayakusho ukuthi: ‘Amen.’
17. “ ‘Makaqalekiswe osusa isikhonkwane somakhelwane wakhe.’“Bonke abantu bayakusho ukuthi: ‘Amen.’
18. “ ‘Makaqalekiswe ophundula impumputhe endleleni.’“Bonke abantu bayakusho ukuthi: ‘Amen.’
19. “ ‘Makaqalekiswe ophendukezela isahlulelo somfokazi, nesentandane, nesomfelokazi.’“Bonke abantu bayakusho ukuthi: ‘Amen.’
20. “ ‘Makaqalekiswe olala nomkayise, ngokuba wambulile umphetho wengubo kayise.’“Bonke abantu bayakusho ukuthi: ‘Amen.’
21. “ ‘Makaqalekiswe olala nesilwane.’“Bonke abantu bayakusho ukuthi: ‘Amen.’
22. “ ‘Makaqalekiswe olala nodadewabo, indodakazi kayise noma indodakazi kanina.’“Bonke abantu bayakusho ukuthi: ‘Amen.’
23. “ ‘Makaqalekiswe olala nomkhwekazi.’“Bonke abantu bayakusho ukuthi: ‘Amen.’
24. “ ‘Makaqalekiswe obulala umakhelwane wakhe ngasese.’“Bonke abantu bayakusho ukuthi: ‘Amen.’
25. “ ‘Makaqalekiswe owamukela umvuzo ukuba abulale ongenacala, achithe igazi lakhe.’“Bonke abantu bayakusho ukuthi: ‘Amen.’