8. a nea bara ba Merari, ka ho lekanyetsa mosebetsi wa bona, makoloi a mane le dipholo tse robileng meno e le mmedi; ba ne ba le pusong ya Ithamare, mora Aarone, moprista.
9. Empa a se ke a nea bara ba Kehathe letho, kahobane ba ne ba beetswe tshebetso ya ho jara ntho tsa sehalalelo ka mahetla a bona.
10. Ka tsatsi leo aletare e neng e kgakolwe ka lona, mohla e tlotswang, marena a tlisa dikabelo tsa wona, marena a hlahisa dikabelo tsa wona pela aletare.
11. Jehova a re ho Moshe: Marena a ke a hlahise dikabelo tsa wona tsa ho kgakola aletare e mong ka tsatsi le leng, e mong ka le leng.
12. Ya kileng a hlahisa kabelo ya hae ka tsatsi la pele, ya eba Nasone, mora Amminadabe, wa leloko la Juda.
13. Kabelo ya hae ya eba mokeke wa silefera, boima ba wona e le dishekele tse lekgolo le nang le mashome e mararo; le morifi wa silefera, tse mashome a supileng, o leng dishekele tsa sehalalelo; tse pedi tseo di ne di tletse lefi la phofo le dubilweng ka ole, e be nyehelo;
14. le pitsa ya kgauta ya dishekele tse leshome, e tletseng dibano;
15. le pohwana ya kgomo, le pheleu, le konyana e tona e lemo se le seng, e be setjheso;
16. le phooko ya sehlabelo sa sebe;
17. tsa sehlabelo sa teboho ya eba poho tse pedi tsa dikgomo, le dipheleu tse hlano, le diphooko tse hlano, le dikonyana tse tona tse hlano tse lemo se le seng. Ke yona kabelo ya Nasone, mora Amminadabe.
18. Ka tsatsi la bobedi, Nethaneele, mora Tsuare, morena wa Issaskare, a hlahisa kabelo ya hae.