1. Ka letsatsi leo Moshe a qetang ho emisa tabernakele, a e tlotsa, a e halaletsa le mesebetsi yohle ya yona, le aletare, le mesebetsi yohle ya yona; a di tlotsa, mme a di kgetha.
2. Yaba marena a Iseraele, dihlooho tsa matlo a bontata bona, tseo e leng marena a meloko, a beilweng ho hlahloba ho balwa ha setjhaba, a hlahisa dikabelo tsa wona.
3. A tlisa dikabelo tsa wona pela Jehova, e leng makoloi a tsheletseng a ditente, le dipholo tse leshome le metso e mmedi, ke ho re, koloi e le nngwe ka marena a mabedi, pholo e le nngwe ka morena a le mong; a di hlahisa pela tabernakele.
4. Jehova a bua le Moshe, a re:
5. Amohela dintho tseo ho bona, ho tle ho etswe tshebetso ya tente ya pokano ka tsona; o di abele Balevi, o nee e mong le e mong ka tshebetso ya hae.
6. Yaba Moshe o nka makoloi le dipholo, a di nea Balevi.
7. A nea bara ba Gershone, ka ho lekanyetsa mosebetsi wa bona, makoloi a mabedi le dipholo tse nne;
8. a nea bara ba Merari, ka ho lekanyetsa mosebetsi wa bona, makoloi a mane le dipholo tse robileng meno e le mmedi; ba ne ba le pusong ya Ithamare, mora Aarone, moprista.
9. Empa a se ke a nea bara ba Kehathe letho, kahobane ba ne ba beetswe tshebetso ya ho jara ntho tsa sehalalelo ka mahetla a bona.
10. Ka tsatsi leo aletare e neng e kgakolwe ka lona, mohla e tlotswang, marena a tlisa dikabelo tsa wona, marena a hlahisa dikabelo tsa wona pela aletare.
11. Jehova a re ho Moshe: Marena a ke a hlahise dikabelo tsa wona tsa ho kgakola aletare e mong ka tsatsi le leng, e mong ka le leng.