23. Ho itswe ke Jehova wa makgotla, Modimo wa Iseraele: Ba sa tla bolela polelo ena lefatsheng la Juda le metseng ya teng, ha ke se ke kgutlisitse ba bona ba kgolehong, ba re: Jehova a ke a o hlohonolofatse, leaho la ho loka, thaba e kgethehileng!
24. Bajuda ba tla ikahela teng hammoho le metse ya bona, balemi le ba tsamayang le mehlape.
25. Hobane ke tla phodisa moya o nyorilweng, moya o mong le o mong o tapileng ke o kgorise.
26. Bakeng sa tseo ka phaphama, mme ka tadima; boroko bo ne bo le monate ho nna.
27. Bonang, ho bolela Jehova, ho tla matsatsi ao ka wona ke tlang ho jalla ntlo ya Iseraele le ntlo ya Juda peo ya batho le peo ya dikgomo.
28. Jwalokaha nkile ka ba lebela ho epolla, le ho qhaqha, le ho ripitla, le ho senya, le ho ba etsa hampe, le hona ke tla ba lebela ho haha, le ho hloma, ho bolela Jehova.