11. Maria qëndronte përjashta pranë varrit duke qarë. Ndërsa qante, u përkul drejt varrit
12. dhe pa dy engjëj të veshur me të bardha që qëndronin atje ku kishte qenë shtrirë trupi i Jezuit, njëri te koka dhe tjetri te këmbët.
13. Ata i thanë: «Grua, përse po qan?».Ajo u tha: «E kanë marrë Zotin tim dhe nuk e di ku e kanë vënë».
14. Si tha këto, ajo u kthye prapa dhe pa Jezuin që qëndronte në këmbë, por nuk e dinte se ishte ai.
15. Jezui i tha: «Grua, përse po qan? Kë po kërkon?».Ajo, duke kujtuar se ishte kopshtari, i tha: «Zotëri, nëse e ke marrë ti, më thuaj ku e vure dhe unë do ta marr».
16. Jezui i tha: «Mari!».Ajo u kthye dhe i tha në hebraisht: «Rabbuni!», që do të thotë mësues.
17. Jezui i tha: «Mos më prek, se nuk jam ngjitur ende tek Ati. Por, shko te vëllezërit e mi dhe thuaju se unë po ngjitem tek Ati im dhe Ati juaj, Perëndia im dhe Perëndia juaj».
18. Maria Magdalena shkoi dhe i lajmëroi dishepujt se kishte parë Zotin dhe se ai i kishte thënë asaj këto fjalë.
19. Në mbrëmjen e po asaj dite, të dielën, ndërsa dyert e vendit ku rrinin dishepujt ishin të mbyllura nga frika e judenjve, erdhi Jezui, qëndroi në mes dhe u tha: «Paqja me ju!».
20. Si tha këto fjalë, u tregoi duart dhe brinjën. Dishepujt u gëzuan kur panë Zotin.
21. Pastaj Jezui u tha përsëri: «Paqja me ju! Sikurse Ati më dërgoi mua, ashtu edhe unë ju dërgoj ju».
22. Pasi tha këto, hukati mbi ta dhe u tha: «Merrni Shpirtin e Shenjtë!
23. Atyre që ua falni mëkatet, do t’u falen, atyre që nuk ua falni, nuk do t’u falen».