7. Ma ‘ua fai atu o Refaelu ‘iā Tovia: A e ulu atu loa i lo ‘outou fale, ‘ia e ifo atu ai i le Ali‘i lou Atua; ‘e te fa‘afetai atu fo‘i ‘iā te ia ma e fa‘alatalata atu i lou tamā ma sogi ‘iā te ia.
8. ‘Ona e nini lea o ona mata i le au o le i‘a ‘ua ‘iā te oe; auā ‘ia e iloa lava e lē pine ‘ona fa‘apupulaina ona mata, ‘ona iloa atu lea e lou tamā le malamalama o le lagi, e ‘oli‘oli fo‘i o ia i le va‘ai atu ‘iā te oe.
9. ‘Ona tamo‘e muamua mai ai lea o le ta‘ifau nā i le malaga ma latou ma ‘ua sau e pei o se savali, o fa‘aali lona fiafia i le tafuefue o lona i‘u.
10. ‘Ona tula‘i lea o lona tamā tauaso, ‘ua amata ‘ona momo‘e, ‘ae tu‘ia ai lona vae; ‘ona u‘u lea i le lima o le tasi ‘au‘auna ma ‘ua alu e fa‘afetaia‘i i lona atali‘i.
11. ‘Ona fusi ai lea ‘iā te ia ma ‘ua sogi ‘iā te ia, ‘ua fa‘apea fo‘i ma lana avā, ‘ona amata lea ‘ona la fētāgisi ‘ona o le ‘oli‘oli.
12. ‘Ua uma ‘ona latou ifo atu i le Atua ma fa‘afetai atu ‘iā te ia, ‘ona latou nonofo ai lea.
13. ‘Ona tago lea o Tovia i le au o le i‘a ma ‘ua nini a‘i mata o lona tamā.
14. ‘Ona fa‘atalitali lea pe tusa ma le vaeluaga o le itūlā, ‘ona āfua ai lea ‘ona to‘ulu le moalili nai ona mata e pei o le afuafu o se fuāmoa.
15. ‘Ua tago i ai o Tovia ma toso ‘ese i ona mata, ‘ona pupula loa lea o ia.
16. Ma ‘ua latou vivi‘i atu i le Atua, o ia ma lana avā ‘atoa ma i latou uma sa masani ma ia.
17. Ma ‘ua fai ane a Topita:‘Ou te vivi‘i atu ‘iā te oe,le Ali‘i e, o le Atua o Isaraelu,auā o oe lava na e sasaina a‘u.O oe fo‘i na e fa‘amālōlō ‘iā te a‘u;a o lenei ‘ua ‘ou iloa atu o lo‘u atali‘i o Tovia.
18. ‘Ua mavae atu aso e fitu, ‘ona taunu‘u mai fo‘i lea o Sara, le avā a lona atali‘i ma le ‘au‘āiga ‘atoa uma, o mālōlōina i latou, ‘atoa ma le lafu manu ma kamela ma tupe e tele a le avā a lona atali‘i, ‘atoa fo‘i ma tupe na ia talia mai ‘iā Kapaelu.
19. Ma ‘ua tala atu e Tovia i ona mātua le agaalofa matalasi a le Atua na fa‘aalia ‘iā te ia i lima o le tagata ‘ua na ta‘ita‘iina o ia.
20. O Akiora fo‘i ma Napata, o ‘āiga o Topita, na la ō mai ‘iā Topita ma le ‘oli‘oli, o fa‘a‘amu‘ia ‘iā te ia ‘ona o mea lelei uma na faia e le Atua ‘iā te ia.