14. E lē aogā ‘iā te oe le mea alofa a le vale,auā e sautuafitu ona mata.
15. E itiiti lana mea e foa‘i mai, ‘ae tele lana ‘ote mai ai,a matala mai lona gutu, e pei e oso mai ai le afi.
16. O le asō e nonō mai ai se mea e ia,a e a taeao, e tagi mai i le fa‘afo‘i atu; e ‘inosia le tagata e fa‘apenā.
17. O le vale e fa‘apea ane: “‘Ua leai ni ana uō, e le o‘otia se loto i ana mea alofa.”
18. O ē ‘a‘ai i ana mea e ‘ai ‘ua pepelo o latou laulaufaiva.Pe fa‘afia ‘ea e ulagia lava ia e le to‘atele!
19. Auā e lē masino i lona mafaufau o mea e tatau ‘ona ia tāofia,e fa‘apea fo‘i ma mea e tatau ‘ona ia avatua.
20. O lē ‘ua pa‘ū ‘ona o lona laulaufaiva pepelo, e sili ‘iā te ia pe ‘ana pa‘ū faō i le ‘ele‘ele;e fa‘apea ‘ona fa‘afuase‘i mai ‘ona fano o ē amio leaga!
21. O le tagata fa‘asoesā ‘ua pei o se tala fatufua,‘ua ta‘u so‘o lava e laugutu o ē ‘ua lē a‘oa‘oina.
22. E lē talileleia le fa‘ata‘oto a‘i laugutu o le vale,auā na te lē ta‘u maia i le itū aso tatau.
23. O le tasi ‘ua lē agasala lava ia, ‘ona o lona mativa;‘ua nofonofo fua o ia, ‘ae tu‘inanau i le agasala.
24. O le tasi e fano ‘ona ‘ua mā lava ia; e fano lava ia i tagata lē mafaufau,e fano ‘ona ‘ua fa‘ailogaina tagata e ia.
25. O le tasi ‘ua folafola atu se mea i lana uō,‘ona ‘ua mā lava ia, ‘ona ‘avea fua ai lea o lenā uō e fai mōna fili.
26. O le talapepelo, o le ila matagā lea i le tagata;e maua so‘o lava i laugutu o tagata ‘ua lē a‘oa‘oina.
27. ‘Ua feoloolo le tagata gaoi, ‘ae leaga le tagata ‘ua saga talapelo;a o lo lā‘ua tofi, o le fanoga lea.
28. O le fua lava lea o le talapepelo, o le fa‘aleaga lava i tagata,e tumau pea ‘iā te i latou lo latou māsiasi.
29. O lē poto i ana ‘upu e ta‘uleleia ai lava ia,a o le tagata mafaufau e fiafia i ai o ē mamalu.
30. ‘Ai se tasi e fa‘ato‘a lona fanua, e maua mai ai e ia fa‘aputuga saito e tele;o lē tauivi i le amiotonu, e fa‘amamaluina ai o ia,a o lē fa‘afiafia i tagata mamalu e ‘alo ‘ese o ia i galuega leaga.
31. O mea alofa ma mea foa‘ifua e fa‘atauaso a‘i mata o le fa‘amasino;e pei fo‘i o se momono i le gutu, e tāofia ai o a‘oa‘iga.