1. Le Atua e,se a le mea ‘ua e lafoa‘iina mai ai i matou e fa‘avavau?Se a fo‘i le mea e pusa mai ai lou to‘asā i le lafu mamoe o lo‘o e fagaina?
2. ‘Ia e manatua mai lau fa‘apotopotoga na e fa‘atauina anamua;o le ‘āiga o lou tofi na e fa‘aolaina;o lenei mauga o Siona na e afio ai.
3. ‘Ia e afio a‘e i mea ‘ua fa‘atafunaina e fa‘avavau;o ē ‘ua ita mai ‘ua fa‘atauma‘oi mea uma i le malumalu.
4. ‘Ua pisapisaō o ē ita ‘iā te oe i totonu o au fa‘apotopotoga;‘ua latou fa‘atūina o latou fa‘ailoga e fai ma fa‘ailoga.
5. ‘Ua iloa i latou, e pei o tagata,‘ona si‘i a‘e o mātau i le vao filifili e tua a‘i.
6. O lenei, ‘ua uma ai ana mea togitogi,‘ua lepetia e i latou i mātau ma samala.
7. ‘Ua latou susunuina lou malumalu i le afi,‘ua latou solia le malumalu o i ai lou suafa,‘ua o‘o i le ‘ele‘ele.
8. ‘Ua latou fa‘apea ifo i o latou loto,“‘Ia tatou fa‘atauma‘oi fa‘atasi i latou;”‘ua latou susunuina mea uma i le nu‘u sa fai ai potopotoga i le Atua.
9. ‘Ua tatou lē iloa o tatou fa‘ailoga;e leai fo‘i se perofeta e totoe;e leai fo‘i so tatou na te iloa pe i‘u afea nei mea.
10. Le Atua e,e fāifai lē ‘ua ita mai se‘ia afea?Pe fa‘avavau ‘ea ‘ona ‘ino‘ino i lou suafa lē ‘ua ita?
11. Se a le mea ‘ua e toe fa‘afo‘i atu ai lou ‘a‘ao,o lou ‘a‘ao taumatau lava?‘ia e tomai ai nai lou fatafata,‘ia e fa‘aumatia i latou.