18. ‘Ua tu‘usaunoa fo‘i ‘outou nai le agasala, a ‘ua fai ma ‘au‘auna a le amiotonu.
19. O ‘upu a tagata ‘ou te fai atu ai nei, ‘ona o le vaivai o ‘outou tino; auā fa‘apei ‘ona ‘outou tu‘uina atu o ‘outou tino e fai ma ‘au‘auna a le amio leaga ma le ulavale, e ulavale ai; ia fa‘apea fo‘i ‘ona tu‘uina atu nei o ‘outou tino e fai ma ‘au‘auna a le amiotonu, e i‘u i le fa‘apa‘iaina.
20. Auā sa aunoa ‘outou ma le amiotonu, ‘ina o ‘au‘auna ‘outou i le agasala.
21. Ni a fo‘i ni fua na ‘iā te ‘outou anamua i na mea ‘ua ‘outou mamā ai i nei ona po? Auā o le i‘uga o ia mea o le oti lea.