1. ‘Ia usiusita‘i tagata uma i faipule silisili; auā e leai se pule pe ā lē mai le Atua; o pule uma lava o lo‘o fai nei, ‘ua fa‘atūina e le Atua.
2. O lenei, o lē na te tete‘e i le pule, ‘ua tete‘e e ia i le sauniga a le Atua; o ē tete‘e fo‘i e sala lava i latou.
3. Auā o ali‘i, e lē se fa‘amata‘u i latou e amio lelei, na o ē amio leaga. O lo‘u mana‘o ‘ea ‘ia e lē fefe i le pule? ‘Ia e amio lelei, ‘ona ta‘uleleia mai lea o oe e ia.
4. Auā o le ‘au‘auna ia a le Atua ‘iā te oe, ‘ia lelei ai; ‘ae ‘āfai ‘e te amio leaga, ‘ia e fefe ai, auā e lē fai fua o ia lana pelu; auā o le ‘au‘auna o ia a le Atua, o lē na te taui atu i le to‘asā i lē amio leaga.
5. O lenei, e tatau ‘ona usiusita‘i, e lē gata ‘ona o le to‘asā, ‘ae peita‘i ‘ona o le loto fuatia ifo.
6. O le mea fo‘i lea tou te avatu ai taulaga, auā o ‘au‘auna i latou a le Atua, o lo‘o finafinau i lenei lava mea.
7. O lenei, ‘ia avatu i tagata uma lava a latou mea; o le lafoga i ē ‘ua tatau i ai le lafoga; o le tiute i ē ‘ua tatau i ai le tiute; o le mata‘u i ē ‘ua tatau i ai le mata‘u; o le fa‘aaloalo i ē ‘ua tatau i ai le fa‘aaloalo.
8. ‘Aua ne‘i ‘iā te ‘outou se mea e tasi a se tasi tagata; ‘ae tau lava o le fealofani; auā ‘ai sē alofa atu i se tasi tagata, ‘ua ‘ato‘atoa ‘ona faia e ia o le tulafono.