11. Fa‘auta fo‘i, sa tutū loa mai tagata e to‘atolu i le fale na ‘ou i ai na ‘a‘auina ‘ia te a‘u mai Kaisareia.
12. Na fai mai le Agaga ‘iā te a‘u matou te ō ma i latou, ‘aua le fa‘ailoga tagata. Na matou ō fo‘i ma le ‘au uso nei e to‘aono, na matou ulu atu fo‘i i le fale o le tagata.
13. ‘Ua na tala mai ‘iā te i matou i lona iloa atu le agelu na tu mai i lona fale, ma fai atu ‘iā te ia, ‘‘Inā ‘a‘au atu ia ni tagata i Iopa, e ‘a‘ami ‘iā Simona e igoa ‘iā Peteru;
14. na te fai mai ‘upu ‘iā te oe e fa‘aolaina ai oe ‘atoa ma lou ‘āiga uma lava.’
15. Na amata ‘ona ‘ou tautala atu ‘ona afio ifo lea o le Agaga Pa‘ia ‘iā te i latou, fa‘apei ‘ona afio ifo ‘iā te i tatou i le amataga.
16. ‘Ona ‘ou manatua lea o le afioga a le Ali‘i, ‘ua fa‘apea mai, ‘Na papatiso lava Ioane i le vai, ‘ae papatisoina ‘outou i le Agaga Pa‘ia.’
17. O lenei, ‘āfai e tusa le alofa ‘ua foa‘iina mai e le Atua ‘iā te i tatou ‘atoa ma i latou, ma ‘ua fa‘atuatua i le Ali‘i o Iesu Keriso, o ai ‘ea a‘u nei ‘ou te mafaia ‘ona vavao atu i le Atua?”
18. ‘Ua latou fa‘alogo mai i ia ‘upu, ‘ona latou fa‘alologo lea, ‘ua vivi‘i atu fo‘i i le Atua, ‘ua fa‘apea ane, “E moni, ‘ua foa‘i atu e le Atua i nu‘u ‘ese le salamō e ola ai.”
19. Na ō atu fo‘i ē na fa‘asalalauina i le sauāga na tupu ‘ina ‘ua oti o Setefano. ‘Ua o‘o lava i Foinie, ma Kuperu, ma Anetioka, ‘ua lē tautala atu i le ‘upu i se tasi na o tagata Iutaia lava.
20. O tagata Kuperu ma Kurene fo‘i nisi o i latou, ‘ua o‘o fo‘i i latou i Anetioka; ‘ua tautala i tagata Eleni, ma folafola atu le tala lelei i le Ali‘i o Iesu.
21. Sa ‘iā te i latou le ‘a‘ao o le Ali‘i; ‘ua fa‘atuatua fo‘i le vao tagata e to‘atele, ma liliu mai i le Ali‘i.
22. ‘Ua logo atu le tala i ia mea i taliga o le ekalesia o i Ierusalema; ‘ona ‘a‘au atu lea e i latou ‘iā Panapa, ‘ia alu atu o ia ‘ia o‘o lava i Anetioka.
23. ‘Ua o‘o atu o ia ma ‘ua iloa le alofa tunoa o le Atua, ‘ona ‘oli‘oli lea o ia ma apoapoa‘i atu ‘iā te i latou uma lava, ia mau o latou loto ‘ina ‘ia pipi‘i atu i le Ali‘i.
24. Auā o le tagata amio lelei o ia, ‘ua tumu i le Agaga Pa‘ia ma le fa‘atuatua; ‘ua fa‘aopoopoina ai fo‘i tagata e to‘atele lava i le Ali‘i.
25. ‘Ona alu lea o Panapa i Taso e sā‘ili ‘iā Saulo.
26. ‘Ua na maua o ia, ‘ona ‘aumaia lea o ia i Anetioka. ‘Ua la fa‘atasi ma le ekalesia ‘ua ‘atoa le tausaga, ma a‘oa‘o atu i tagata e to‘atele lava; na ulua‘i igoa fo‘i le ‘au so‘o o “Kerisiano” i Anetioka.