1. ‘Ua o‘o i le aso na uma ai ‘ona fa‘atūina e Mose o le malumalu, ma na fa‘au‘uina ma fa‘apa‘iaina ai, ma mea uma o i ai, o le fatafaitaulaga fo‘i ma ana mea uma na ia fa‘au‘uina ai, ma fa‘apa‘iaina.
2. ‘Ona fai taulaga ai lea o ali‘i sili o Isaraelu, o matai o ‘āiga o latou tamā, o ali‘i sili i latou o itū‘āiga, o ē na pule i ē na faitaulia,
3. ‘ua latou ‘aumai a latou taulaga i luma o le ALI‘I, o fata fa‘ata‘avalevale ‘ua ufitia e ono, ma povi e sefulu ma le lua, o ali‘i e ta‘ito‘alua ma le fata fa‘ata‘avalevale e tasi, ma a latou povi e ta‘itasi; ‘ua latou ‘aumai ai i luma o le malumalu.
4. ‘Ona fetalai mai ai lea o le ALI‘I ‘iā Mose, ‘ua fa‘apea mai:
5. ‘Ia e talia ia mea mai ‘iā te i latou, ‘ina ‘ia fai a‘i le galuega o le fale fetāfa‘i o le fa‘apotopotoga; ‘e te tu‘uina atu ai i sa Levī, o le tagata ma le mea e tatau i lana galuega.
6. ‘Ona talia lea e Mose o fata fa‘ata‘avalevale ma povi ma tu‘u atu ai i sa Levī,
7. o fata fa‘ata‘avalevale e lua ma povi e fa na ia tu‘uina atu ai i le fānauga a Keresoma, e fa‘atatau i la latou galuega.
8. O fata fa‘ata‘avalevale e fa ma povi e valu na ia tu‘uina atu ai i le fānauga a Merari, e fa‘atatau i la latou galuega, i le pule a Itamaro le atali‘i o Arona le ositaulaga.
9. A o le fānauga a Koato na ia lē tu‘uina atu i ai se mea; auā o le galuega o le malumalu na ‘iā te i latou, latou te tau‘ave ai i o latou ua.
10. ‘Ua fai taulaga fo‘i ali‘i sili i le fa‘asāina o le fatafaitaulaga i le aso ma fa‘au‘uina ai, ‘ua avatu ai e ali‘i sili a latou taulaga i luma o le fatafaitaulaga.
11. ‘Ona fetalai mai ai lea o le ALI‘I ‘iā Mose: E ta‘itasi le ali‘i sili ma lona aso latou te ‘aumai ai a latou taulaga i le fa‘asāina o le fatafaitaulaga.
12. O lē na ‘aumai lana taulaga i le ulua‘i aso, o Naasona lea o le atali‘i o Aminatapu, o le itū‘āiga o Iuta ia;
13. o lana taulaga fo‘i o le tanoa ario e tasi, o lona mamafa e tasi le selau ma le tolugafulu o sekeli; o le ipu ario e tasi, e fitugafulu o sekeli lona mamafa, o le sekeli lea o le malumalu; ‘ua tūtūmu ia mea e lua i le falaoa lelei ‘ua palua ma le u‘u e fai ma taulaga i mea e ‘ai;
14. o le ipu auro e tasi, e sefulu o sekeli lona mamafa, ‘ua tumu i mea manogi e mū;
15. o le povi po‘a ta‘anoa e tasi, o le mamoe po‘a e tasi, ma le tama‘i mamoe e tasi ‘ua tasi lona tausaga, e fai ma taulaga mū;
16. o le ‘oti po‘a e tasi, e fai ma taulaga mo le agasala;