17. ‘Ona fetalai atu ai lea o Iesu ‘iā te ia, “Se ā le mea ‘e te fesili mai ai ‘iā te a‘u i se mea e lelei? E to‘atasi lē o lo‘o lelei. ‘Āfai ‘e te fia o‘o i le ola, ‘ia e tausi i poloa‘iga.”
18. ‘Ua fai mai o ia ‘iā Iesu, “Po o a ia poloa‘iga?”‘Ona fa‘apea atu ai lea o Iesu, “‘Aua ‘e te fasioti tagata, ‘aua ‘e te mulilua; ‘aua ‘e te gaoi, ‘aua ‘e te molimau pepelo.
19. ‘Ia e āva i lou tamā ma lou tinā; ma ‘ia e alofa atu i lē lua te tuā‘oi, ‘ia pei o oe lava ‘iā te oe.”
20. ‘Ona fai mai ai lea o le taule‘ale‘a ‘iā te ia, “‘Ua ‘ou tausia na mea uma talu ‘ina ‘ou itiiti, se ā se mea o toe ‘ou te le‘i faia?”
21. ‘Ua tali atu Iesu ‘iā te ia, “‘Āfai ‘e te mana‘o ‘ina ‘ia ‘ato‘atoa ‘ona lelei o lau amio, ‘ia e alu ma e fa‘atau atu au mea, i le e avatu ai i ē matitiva; ‘ona ‘iā te oe lea o le faulaiga‘oloa i le lagi, i le e sau ma mulimuli mai ‘iā te a‘u.”
22. ‘Ua fa‘alogo le taule‘ale‘a i lea ‘upu, ‘ona alu ‘ese ai lea o ia ma le tigā, auā e tele lava ana mea.
23. ‘Ona fetalai atu ai lea o Iesu i ona so‘o, “E moni, ‘ou te fai atu ‘iā te ‘outou, e faigatā ‘ona sao atu o le mau‘oa i le mālō o le lagi.
24. ‘Ou te fai atu fo‘i ‘iā te ‘outou, e faigofie ‘ona ui atu o se kamela i le pū o le au, ‘ae faigatā ‘ona sao atu le mau‘oa i le mālō o le Atua.”
25. ‘Ua fa‘alogo ai ona so‘o, ‘ona latou matuā taufaiofo ai lea, ‘ua fa‘apea ane, “‘Āfai o lea, o ai sē tasi e mafai ‘ona fa‘aolaina?”
26. ‘Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”
27. ‘Ona tali mai ai lea o Peteru ‘ua fa‘apea mai ‘iā te ia, “Fa‘auta, ‘ua matou tu‘ua mea uma, ‘ae matou mulimuli atu ‘iā te oe, se a fo‘i se mea matou te maua?”
28. ‘Ona fetalai atu ai lea o Iesu ‘iā te i latou, “E moni ‘ou te fai atu ‘iā te ‘outou, o ‘outou ‘ua mulimuli mai ‘iā te a‘u, pe a ti‘eti‘e le Atali‘i o le tagata i lona nofoāli‘i mamalu i le toefuata‘iga, tou te ti‘eti‘e ai fo‘i i nofoāli‘i e sefulu ma le lua, e fa‘amasino ai i itū‘āiga o Isaraelu e sefulu ma le lua.
29. ‘Ai sē tasi ‘ua ia tu‘ua o fale, po o uso, po o tuafafine, po o le tamā, po o le tinā, po le avā, po o le fānau, po o fanua ‘ona o lo‘u igoa, e maua e ia e ta‘isautuaselau, e fai fo‘i mōna tofi le ola fa‘avavau.
30. ‘Ae to‘atele o ē ‘ua muamua e ‘avea ma mulimuli; o ē ‘ua mulimuli fo‘i e ‘avea ma muamua.#