1. O lenei fo‘i, ‘ua ‘iā te ‘outou le ‘au ositaulaga lenei poloa‘iga.
2. ‘Āfai tou te lē fa‘alogo mai, ‘āfai fo‘i tou te lē mafaufau ‘ina ‘ia ‘aumaia le vi‘iga i lo‘u igoa, ‘ua fetalai mai ai le ALI‘I o ‘au, ‘ona ‘ou ‘auina atu ai lea o le fa‘afanoga ‘iā te ‘outou ma ‘ou fa‘afanoina mea tou te manuia ai; a ‘ua ‘ou fa‘afanoina lava; auā na ‘outou le mafaufau i ai.
3. Fa‘auta, ‘ou te a‘oa‘i atu i le fua saito ‘ona o ‘outou; ‘ou te palasi fo‘i le otaota o manu i o ‘outou mata, o le otaota o taulaga o a ‘outou tausamiga, le ‘ave‘esea fo‘i ‘outou fa‘atasi ma lea mea.
4. Tou te iloa ai, ‘ua ‘ou avatu lenei poloa‘iga ‘iā te ‘outou; auā sa ‘iā Levī la‘u feagaiga, ‘ua fetalai mai ai le ALI‘I o ‘au.
5. Sa ‘iā te ia la‘u feagaiga o i ai le ola ma le manuia; na a‘u avatu ia mea ‘iā te ia ‘ona o lona mata‘u na mata‘u ai o ia ‘iā te a‘u; ‘ua ia matuā mata‘u i lo‘u igoa.
6. O le matā‘upu o le fa‘amaoni sa i lona gutu lea; na lē iloa fo‘i se mea lē tonu i ona laugutu; na sāvavali fa‘atasi ma a‘u i le amio filemū ma le amio sa‘o; na ia fa‘aliliuina fo‘i ē to‘atele nai le amioletonu.
7. Auā o laugutu o le ositaulaga e tausia ai le poto, latou te sā‘ilia fo‘i le tulafono a‘i lona gutu; auā o le sāvali o ia a le ALI‘I o ‘au.
8. A o ‘outou, ‘ua ‘outou ō ‘ese i le ala, ma ‘outou fa‘atausuai i ē to‘atele i le tulafono; ‘ua leaga ‘iā te ‘outou le feagaiga a Levi, ‘ua fetalai mai ai le ALI‘I o ‘au.
9. O a‘u fo‘i, ‘ua ‘ou tu‘uina atu ‘outou ‘ia ‘inosia ma ta‘ufa‘atauva‘aina ‘outou e le nu‘u uma, e pei ‘ona ‘outou lē tausi i o‘u ala ma ‘outou fa‘ailogaina tagata i le tulafono.