25. Fa‘auta fo‘i, sa i Ierusalema le tagata e igoa ‘iā Simeona; o le tagata amiotonu o ia ma le amioatua, sa fa‘atalitali atu o ia i le fa‘amafanafanaina o Isaraelu; ‘ua i luga ‘iā te ia le Agaga Pa‘ia.
26. ‘Ua uma ‘ona fa‘aalia ‘iā te ia e le Agaga Pa‘ia, na te lē iloa le oti se‘ia mua‘i iloa atu le Keriso o le Ali‘i.
27. O le Agaga ‘ua alu ai o ia i le malumalu; ‘ua ‘aumai le tama o Iesu e ona mātua, ‘ia la faia ‘iā te ia fa‘apei ‘ona tatau i le tulafono,
28. ‘ona sapaia lea e ia i ona lima, ‘ua fa‘afetai atu i le Atua, ‘ua fa‘apea atu:
29. “Le Ali‘i e, ‘e te tu‘uina atu nei lau ‘au‘auna ‘ia alu,ma le manuia, pei o lau afioga;
30. auā ‘ua iloa e o‘u mata le fa‘aolataga mai ‘iā te oe,
31. ‘ua e saunia i luma o nu‘u uma lava.
32. O le malamalama e fa‘amalamalama ai nu‘u ‘ese, ma le mamalu o lou nu‘u o Isaraelu.”
33. ‘Ua ofo lava lona tamā ma lona tinā i mea ‘ua ta‘ua ‘iā te ia.
34. ‘Ua fa‘amanuia atu Simeona ‘iā te i lā‘ua, ‘ua fai atu fo‘i ‘iā Maria lona tinā. “Fa‘auta, ‘ua tu‘u le tama nei e pa‘u‘ū ai ma toe tutū ai tagata e to‘atele o i Isaraelu; e fai fo‘i ma fa‘ailoga e fa‘aleagaina;
35. e tuia fo‘i lou lava loto ‘ia ati i le pelu, ‘ina ‘ia fa‘aalia mai ai manatu o loto o tagata e to‘atele.”
36. Sa i ai fo‘i le perofeta fafine o Ana, o le afafine o Fanuelu o le itū‘āiga o Asera, ‘ua lo‘omatua o ia, sa lā nonofo ma lana tane i tausaga e fitu talu ‘ina o taupou.
37. A ‘ua oti lana tane; o ona tausaga ‘ua tusa ma le valusefulu ma le fa, e le‘i alu ‘ese o ia i le malumalu, a ‘ua ‘au‘auna o ia i le Atua i anapogi ma talosaga i le ao ma le pō.
38. O lea lava itū aso, ‘ua sau ai o ia, ‘ua fa‘afetai atu i le Ali‘i ma tautala ‘iā te ia i tagata uma lava ē na fa‘atali atu i le togiola i Ierusalema.
39. ‘Ua uma ‘ona faia e i lā‘ua o mea uma e tatau i le tulafono a le Ali‘i, ‘ona fo‘i atu lea i Kalilaia, i la lā‘ua ‘a‘ai o Nasareta.
40. ‘Ua tupu le tama, ma ‘ua malosi lona loto, ‘ua tumu i le poto; ‘ua ‘iā te ia fo‘i le alofa o le Atua.
41. ‘Ua ō i Ierusalema ona mātua i lea tausaga ma lea tausaga i le tausamiga o le paseka.