9. “Fa‘auta fo‘i, o a‘u, ‘ou te fa‘atumauina la‘u feagaiga ma ‘outou ma a ‘outou fānau pe a mavae ‘outou;
10. ‘atoa fo‘i ma mea ola uma o ‘iā te ‘outou, o manu felelei, o manu vaefā fanua, ma manu o le vao uma o ‘iā te ‘outou, o mea uma ‘ua ulufafo i le va‘a e o‘o i manu uma o le lalolagi.
11. ‘Ou te fa‘atumauina lava la‘u feagaiga ma ‘outou; e lē toe fa‘aumatia lava mea ola uma i le vai o se lolo; e leai fo‘i se toe lolo e fa‘aumatia ai le lalolagi.”
12. ‘Ua fetalai atu fo‘i le Atua, “O le fa‘ailoga lenei o le feagaiga ‘ou te faia ma ‘outou, ‘atoa ma mea ola uma o ‘iā te ‘outou, e autupulagā lava;
13. ‘ua ‘ou tu‘uina la‘u nuanua i le ao, e fai ma fa‘ailoga o le feagaiga a le lalolagi ma a‘u.
14. A ‘ou fa‘amalumaluina ifo le lalolagi i se ao ma ‘ua iloa le nuanua i le ao;
15. ‘ona ‘ou manatua lea o la‘u feagaiga ‘ua ‘ou osia ma ‘outou, ma mea ola ‘ese‘ese uma lava; e lē toe ‘avea le vai ma lolo e fa‘aumatia ai mea ola uma.
16. E i ai fo‘i le nuanua i le ao, ‘ou te va‘ai fo‘i i ai, e manatua ai le feagaiga e fa‘avavau ‘ua osia e a‘u o le Atua ma mea ola ‘ese‘ese uma lava o i le lalolagi.”
17. ‘Ua fetalai atu le Atua ‘iā Noa, “O le fa‘ailoga o le feagaiga na ‘ou fa‘atumauina e a‘u ma mea ola uma o i le lalolagi.”
18. O atali‘i fo‘i nei o Noa ē na ulufafo i le va‘a, o Semu ma Hamo ma Iafeta; o Hamo fo‘i o le tamā ia o Kanana.
19. O atali‘i nei e to‘atolu o Noa; o i latou fo‘i na ‘ainā solo ai le lalolagi uma.
20. ‘Ona amata lea e Noa ‘ona galue i le ‘ele‘ele, ‘ua ia fai fo‘i le tōvine.
21. ‘Ua inu fo‘i e ia le uaina, ma ‘ua ‘onā ai; ‘ua lē lavalavā fo‘i o ia i lona fale ‘ie.
22. ‘Ona iloa atu lea e Hamo le tamā o Kanana le lē lavalavā o lona tamā, i le ‘ua ta‘uina atu e ia i ona uso e to‘alua i fafo.
23. ‘Ona fetāgofi lea o Semu ma Iafeta i le ‘ofu ma fa‘ae‘e ai i o la tau‘au ma la sāvavali tu‘umuli i tua, ma ufiufi ai le lē lavalavā o lo la tamā; ‘ua fa‘asaga ‘ese, fo‘i o lā‘ua mata, ‘ua lē iloa atu fo‘i o i lā‘ua le lē lavalavā o lo la tamā.
24. ‘Ua ala Noa i lana uaina, ‘ua iloa fo‘i e ia le mea na faia ‘iā te ia e lona atali‘i aupito itiiti,
25. ‘ona fai ane lea o ia:“E malaia Kanana,e matuā fai o ia ma pologa i ona uso.”
26. ‘Ua fai ane fo‘i o ia,“‘Ua fa‘afetaia le ALI‘I le Atua o Semu,e fai fo‘i Kanana mōna pologa.
27. E fa‘alauteleina Iafeta e le Atua,e mau fo‘i o ia i fale ‘ie o Semu;e fai fo‘i Kanana mōna pologa.”
28. Na ola fo‘i Noa talu mai le lolo i tausaga e tolu selau ma le limagafulu.
29. O aso uma fo‘i o Noa e iva selau ma le limagafulu, o ona tausaga ia, ‘ona oti ai lea.