1. ‘Ua fetalai atu le ALI‘I ‘iā Noa, “‘Inā ulu atu ia o oe ‘atoa ma lou ‘āiga uma i le va‘a auā ‘ua ‘ou iloa oe o le amiotonu i o‘u luma i lenei tupulaga.
2. ‘ia e ‘ave e ta‘ifitu i manu vaefā uma e mamā, o le manu po‘a ma le manu fafine; a o manu vaefā e lē mamā e ta‘ilua ia, o le manu po‘a ma le manu fafine.
3. O manu felelei fo‘i e ta‘ifitu o le manu po‘a ma le manu fafine, ‘ia ola mai ai a latou fānau i le fogā‘ele‘ele uma.
4. Auā e toe fitu aso ‘ona ‘ou fa‘atotōina ifo ai lea o le timu i le lalolagi e fagafulu ona ao e fagafulu fo‘i ona pō, ‘ou te sōloi‘esea fo‘i i le fogā‘ele‘ele o mea ola uma ‘ua ‘ou faia.”
5. Na faia fo‘i e Noa e tusa ma mea uma na poloa‘i atu ai le ALI‘I ‘iā te ia.
6. O le ono selau o tausaga o Noa na o‘o ai le lolo i le lalolagi.
7. ‘Ua ulu atu Noa ma ona atali‘i ma lana avā, ma avā a ona atali‘i fa‘atasi ma ia i le va‘a ‘ona o le lolo.
8. O manu vaefā e mamā, ma manu vaefā e lē mamā ma manu felelei, ‘atoa ma mea uma e fetolofi i le ‘ele‘ele,
9. ‘ua ta‘ilua ona ulu atu i latou ‘iā Noa i le va‘a, o le manu po‘a ma le manu fafine, e fa‘apei ‘ona poloa‘i atu ai le Atua ‘iā Noa.
10. ‘Ua o‘o fo‘i i le aso fitu, ‘ona o‘o ai lea o le vai o le lolo i le lalolagi.
11. O le tausaga e ono selau o le olaga o Noa, o le masina e lua, o le aso e sefulu ma le fitu o le masina, o le aso lava lea na lepeti ai o punāvai uma o i le moana sausau ma ‘ua fa‘aavanoaina pupuni o le lagi.
12. Sa i ai le uaga i le lalolagi i ao e fagafulu ma pō e fagafulu.
13. O le aso lava lea na ulu atu ai Noa ma atali‘i o Noa, o Semu, ma Hamo ma Iafeta ma le avā a Noa, ma avā e to‘atolu a ona atali‘i, e fa‘atasi ma i latou i le va‘a.
14. O i latou nei ma manu o le vao uma e ta‘itasi ma lona uiga ma manu vaefā fanua uma e ta‘itasi ma lona uiga ma mea fetolofi uma e fetolofi i le ‘ele‘ele e ta‘itasi ma lona uiga ma manu felelei uma e ta‘itasi ma lona uiga, o mea felelei uma e ta‘itasi ma uiga ‘ese‘ese.