16. ‘Ona tula‘i lea o ia tagata nai lea mea ma fa‘asaga atu i Sotoma; ‘ua latou ō fo‘i ma Aperaamo na te molimolia i latou.
17. ‘Ona fetalai ane lea o le ALI‘I, “‘Ou te natia ‘ea ‘iā Aperaamo le mea o le a ‘ou faia?
18. Auā fo‘i o Aperaamo o le a fai o ia ma tupuga o le nu‘u tele ma le malosi; e manuia fo‘i ‘iā te ia o nu‘u uma o le lalolagi.
19. Auā ‘ua ‘ou iloa o ia na te poloa‘i atu i ana fānau ma lona ‘āiga pe a mavae atu o ia; latou te tausia le ala o le ALI‘I, i lo latou fai amiotonu ma fa‘amasinoga, ‘ina ‘ia fa‘ataunu‘uina e le ALI‘I ‘iā Aperaamo le mea ‘ua ia fetalai atu ai ‘iā te ia.”
20. ‘Ona fa‘apea lea a le ALI‘I, “O le ‘alaga mai Sotoma ma Komoro ‘ua tele ma ‘ua matuā tele lava a latou agasala;
21. o le mea lea ‘ou te alu ifo ai, ‘ia iloa po ‘ua faia lava e i latou e pei o le ‘alaga ‘ua o‘o mai ai ‘iā te a‘u; ‘āfai fo‘i ‘ua leai, ‘ou te iloa lava.”
22. ‘Ona tu‘ua lea o lea mea e nei tagata, ‘ua ō atu i Sotoma; a o Aperaamo ‘ua tu pea o ia i luma o le ALI‘I.
23. ‘Ona fa‘alatalata atu lea o Aperaamo, ‘ua fa‘apea atu, “‘E te fa‘aumatia ‘ea ē ‘ua amiotonu fa‘atasi ma ē amio leaga?
24. Pe ‘āfai o i le ‘a‘ai tagata e to‘alimagafulu o ē amiotonu, ‘e te fa‘aumatia ‘ea ‘ae lē fa‘asaoina le nu‘u ‘ona o le to‘alimagafulu o ē amiotonu o i ai?
25. ‘Ia mamao lava ‘iā te oe ‘ona e faia fa‘apea e fasioti i ē amiotonu fa‘atasi ma ē amio leaga; ma ona fa‘agatusa ē amiotonu ma ē amio leaga, ‘ia mamao lava lea ‘iā te oe. O lē na te fa‘amasinoina le lalolagi uma, e lē faia ‘ea e ia le fa‘amasinoga tonu?”
26. ‘Ona fa‘apea mai lea o le ALI‘I, “‘Āfai ‘ou te maua i Sotoma tagata amiotonu e to‘alimagafulu i le ‘a‘ai, ‘ona ‘ou fa‘asao ai lea o le nu‘u uma ‘ona o i latou.”
27. ‘Ona tali atu lea o Aperaamo, ‘ua fa‘apea atu, “Fa‘auta mai o a‘u nei o le efuefu ma le lefulefu, ‘ua ‘ou fa‘amalosi e tautala atu i le ALI‘I;
28. ‘āfai ‘ua toe to‘alima ē fa‘a‘atoa ai le to‘alimagafulu o tagata amiotonu, ‘e te fa‘aumatia ‘ea le ‘a‘ai uma ‘ona o le to‘alima?”‘Ona tali mai lea o ia, “‘Āfai ‘ou te maua ai se to‘afagafulu ma le to‘alima ‘ou te lē fa‘aumatia lava.”
29. ‘Ona toe fai atu lea o Aperaamo ‘iā te ia, ‘ua fa‘apea atu, “Pe ‘āfai ‘ua maua ai le to‘afagafulu e a ‘ea?”‘Ona fetalai mai lea o ia, “‘Āfai ‘ou te maua ai le to‘afagafulu ‘ou te lē faia lava ‘ona o i latou.”