1. O ona po o Amarafilo le tupu o Senara, o Arioka le tupu o Alasara, o Kitalaoma le tupu o Elama ma Titalu le tupu o nu‘u
2. na latou si‘i atu ai le tau‘a ‘iā Pira le tupu o Sotoma, ma Piresa le tupu o Komoro, ma Senapo le tupu o Atama, ma Semepo le tupu o Sepoima, ‘atoa ma le tupu o Pala, o Soara lea.
3. ‘Ua fa‘apotopoto i latou nei uma i le vanu o Setima, o le sami ‘o‘ona lea.
4. E sefulu ma le lua o tausaga o nofo pologa ai i latou ‘iā Kitalaoma, ‘ua o‘o i le tausaga e sefulu ma le tolu ‘ona latou fou ai lea.
5. O lea tausaga fo‘i e sefulu ma le fa ‘ua ō mai ai Kitalaoma ma tupu sa ‘au fa‘atasi ma ia, ma latou fafasi i tagata o sa Rafā i Aserota Karenaima, ma tagata Susema i Hamo ma tagata Emema i Save Kiriataima,
6. ma sa Horī i lo latou mauga o Seira, e o‘o atu i Eleparana, e latalata lea i le vao.
7. ‘Ua latou toe fo‘i mai, ‘ua o‘o i Enemisipata, o Katesa lea, ma latou fafasi i le nu‘u uma o sa Amalekā, ‘atoa fo‘i ma sa Amorī sa nonofo i Haseso Tamara.
8. ‘Ua ō atu fo‘i le tupu o Sotoma, ma le tupu o Komoro, ma le tupu o Atama, ma le tupu o Sepoima ma le tupu o Pala, o Soara lea; ma latou tau ai le tau‘a ma i latou i le vanu o Setima;
9. o i latou o Kitalaoma le tupu o Elama, ma Titalu le tupu o nu‘u, ma Amarafilo le tupu o Senara, ma Arioka le tupu o Alasara; o tupu na e to‘afa ma ia tupu e to‘alima.
10. Sa i ai fo‘i i le vanu o Setima o lua o pulu emeri e tele lava; na sōsōla fo‘i le tupu o Sotoma ma le tupu o Komoro; ma pa‘u‘ū i le mea; a o ē na totoe na sōsōla i latou i le mauga.
11. ‘Ona latou vetea lea o ‘oloa uma o Sotoma ma Komoro, ‘atoa ma a latou mea e ‘ai uma, ‘ona ō ai lea o i latou.
12. ‘Ua latou ‘avea fo‘i Lota le atali‘i o le uso o Aperamo, ‘atoa ma ana ‘oloa, o ia fo‘i sa nofo i Sotoma, ‘ona ō ai lea o i latou.
13. ‘Ua alu atu fo‘i le tasi na sao ma ta‘u atu ‘iā Aperamo le Eperu, o lē sa mau i aluna o Mamere o sa Amorī, o le uso o Esekolo, o le uso fo‘i o Aneri, o i latou na osi feagaiga ma Aperamo.
14. ‘Ua fa‘alogo Aperamo ‘ua ‘avea lona uso i le tau‘a, ‘ona saunia lea e ia ona tagata ‘ua a‘oa‘oina, ē na fānanau i lona ‘āiga, e to‘atolu selau ma le to‘asefulu ma le to‘avalu, ma ‘ua tuliloa ‘iā te i latou e o‘o i Tanu.