9. a o nei ona pō ‘ina ‘ua ‘outou iloa le Atua, pe sili pe a fa‘apea ‘ina ‘ua iloa lava ‘outou e le Atua, pe fa‘apefea ‘ona ‘outou toe liliu i matā‘upu muamua e vaivai ma fa‘atauva‘a, ‘ua ‘outou toe manana‘o ‘ea ia ‘outou toe nofo pologa i ai?
10. Tou te ‘ana‘ana i aso, ma masina, ma tau, ma tausaga.
11. ‘Ou te fefe ‘iā te ‘outou, ‘ina ne‘i i‘u ‘ina fa‘alēaogāina la‘u galuega na ‘ou faia ‘iā te ‘outou.
12. Le ‘au uso e, ‘ou te ‘ai‘oi atu ‘iā te ‘outou, ‘ia fa‘apei o a‘u ‘outou, auā o a‘u ‘ua pei o ‘outou; na lē agaleagaina a‘u e ‘outou i se mea e tasi.
13. ‘Ua ‘outou iloa o le ma‘i ‘ua ala ai ‘ona mua‘i folafola ai le tala lelei ‘iā te ‘outou;
14. o le tofotofoga fo‘i sa ‘iā te ‘outou i lo‘u nei tino e le‘i ta‘ufa‘atauva‘aina ai a‘u e ‘outou, pe ‘inosia fo‘i, a ‘ua ‘outou talia mai a‘u peiseaī se agelu a le Atua, peiseaī o Keriso Iesu.
15. Pe fa‘apefea fo‘i lo ‘outou manuia sa fai mai? Auā o la‘u mau lenei ‘iā te ‘outou, ‘ana ‘outou mafaia, po ‘ua ‘outou sasali mai o ‘outou mata, ma foa‘i mai ‘iā te a‘u.
16. ‘Ia, po ‘ua ‘outou ‘avea ‘ea a‘u mo ‘outou fili i lo‘u ta‘uina atu ‘iā te ‘outou le ‘upu moni?
17. Latou te naunau ‘iā te ‘outou, ‘ae fa‘alētatau; ‘ae peita‘i latou te fia, tu‘u‘ese‘eseina ‘outou ma a‘u, ‘ina ‘ia ‘outou naunau ‘iā te i latou.
18. E tatau le ta‘uleleia pea i le mea lelei e lē aunoa, ‘aua ne‘i gata ‘ina o ‘iā te ‘outou o a‘u.
19. La‘u fānau e, ‘ou te toe ‘o‘ono ai i ‘ou fa‘atigā, se‘ia tino Keriso i totonu ‘iā te ‘outou.
20. ‘Ou te loto ‘ina ‘ia ‘ou i ai ‘iā te ‘outou i ona po nei, ma tautala fa‘atatau atu, auā ‘ua fa‘alētonu lo‘u manatu ‘iā te ‘outou.
21. ‘Inā ta‘u mai ia ‘iā te a‘u ‘outou o ē fia nonofo i le tulafono, tou te lē fa‘alogo atu ‘ea i le tulafono?
22. Auā ‘ua tusia, sa ‘iā Aperaamo atali‘i e to‘alua, o le tasi na fānau mai i le fafine nofo pologa, a o le tasi i le fafine sa‘oloto.
23. ‘Ae peita‘i o le tama a le fafine nofo pologa, ‘ua fānau lea i la le tino; a o le tama a le fafine sa‘oloto, na fānau ia ‘ona o le mea na folafolaina.
24. ‘Ua fai ma mea fa‘atusa ia mea; auā o fafine nei o feagaiga e lua ia; o le tasi mai le mauga o Sinai, e fānau mai tama e fai ma pologa, o Akara lea.
25. Auā o Akara lenei o le mauga o Sinai ia i Arapi; ‘ua la tutusa ma Ierusalema i ona po nei, ‘ua nofo pologa ‘atoa ma lana fānau.
26. A o Ierusalema i lugā o le sa‘oloto ia, o le tinā o i tatou uma lava ia.
27. Auā na tusia, “‘Ia e ‘oli‘oli oe le fafine e pā sa lē fānau;ia ē uiō ma leo tele oe sa le fa‘atigā;auā ‘ua tele le fānau a lē ‘ua nofo fua,i la le nofo tane.”