7. ‘Ua tūtūmu ou vanu e sili ‘ona lelei i kariota,‘ua pae tau mai fo‘i ‘au e ti‘eti‘e i solofanua i le faitoto‘a.
8. ‘Ua tō ‘ese le ufiufi o Iuta.O lea aso fo‘i ‘e te fa‘asaga ai i ‘au‘upega o i le fale i le vao.
9. ‘Ua ‘outou va‘ava‘ai i mea ‘ua lepetia i le ‘a‘ai o Tavita ‘ina ‘ua tele ma ‘outou fa‘apotopotoina le vai o le lepa aupito i lalo.
10. ‘Ua ‘outou faitauina fo‘i fale o Ierusalema ma ‘outou lepetia fale e teu a‘i le ‘olo.
11. ‘Ua ‘outou ‘elia se mea i le vā o pā e lua e tali ai le vai o le lepa tuai; a ‘ua ‘outou le fa‘asaga atu i lē ‘ua tupu ai ia mea, ‘ua ‘outou le va‘ai atu fo‘i i lē na saunia ai anamua.
12. O lea aso fo‘i ‘ua vala‘au mai ai le Ali‘i le ATUA o ‘au‘ia fētāgisi ma ‘ia taufaitagitu‘ima ia sele mamā lauulu ma ia lavalava i ‘ie talatala.
13. Fa‘auta fo‘i, o le fiafia ma le ‘oli‘oli,o le fasiga o povi ma le fasiga o mamoe,o lo‘o ‘a‘ai tufa‘aga ma inu uaina,“‘Inā tatou ‘a‘ai ia ma inu;auā a taeao tatou te oti ai.”
14. A ‘ua fa‘aalia mai i o‘u taliga e le ALI‘I o ‘au:E matuā le fa‘amāgaloina lenā agasala ‘iā te ‘outou e o‘o i lo ‘outou oti,o lo‘o fa‘apea mai ai le Ali‘i le ATUA o ‘au.
15. ‘Ua fa‘apea ‘ona fetalai mai o le Ali‘i le ATUA o ‘au: Sau ia, ‘inā alu i lenā ‘au‘auna ‘ua pule, o Sevena fo‘i, o lē ‘ua pule i le ‘āiga, ‘ia fa‘apea atu i ai:
16. Se a ‘ea se mea ‘ua ‘iā te oe ‘i‘inā? o ai ‘ea fo‘i o ‘iā te oe i le mea nei? ‘ina ‘ua e ‘elia mo oe se tu‘ugamau i le mea nei ‘ua ‘eli e ia lona tu‘ugamau i le mea maualuga, ‘ua foa i le papa se fale mo ia.
17. Fa‘auta, o le ALI‘I na te matuā lafotūina oe ma le malosi tele, na te ufitia lava oe.
18. Na te matuā lialia‘i oe, e lialia‘i e pei o se mea lapotopoto e sasau atu i le nu‘u lautele; ‘e te oti ai, e i ai fo‘i ou nofoa fa‘ata‘avalevale matagofie, o le gao o le ‘āiga o lou ali‘i.
19. ‘Ou te tulia oe i lou tofi, ‘ou te lafotūina fo‘i oe i le mea ‘ua e tu ai.
20. O lea aso fo‘i ‘ou te vala‘auina ai la‘u ‘au‘auna o Eliakimo le atali‘i o Hilikia;
21. ‘ou te fa‘a‘ofuina fo‘i o ia i lou ‘ofu ma ‘ou fa‘amalosi ‘iā te ia i lou fusi; ‘ou te tu‘uina atu ‘iā te ia lau pule, e ‘avea fo‘i o ia ma tamā o ē nonofo i Ierusalema ‘atoa ma le ‘āiga o Iuta.