15. E le‘i i ai fo‘i ‘iā Aikupito se mea e fai,se mea lava e fai e le ulu po o le i‘u,e le lau pama po o le fiso.
16. O lea aso e tusa ai Aikupito ma fafine e gatete ma fefefe i latou ‘ona o le ‘a‘ao o le ALI‘I o ‘au ‘ua si‘itia, ‘ua si‘itia e ia i luga ‘iā te i latou.
17. E ‘avea fo‘i le nu‘u o Iuta ma mea e mata‘u ai Aikupito; o i latou uma o ē ta‘uta‘u atu lea nu‘u ‘iā te i latou, latou te fefefe ai, ‘ona o le pule a le ALI‘I o ‘au ‘ua ia pule i ai.
18. O lea aso e tautala ai nu‘u e lima i le lau‘ele‘ele o Aikupito i le gagana a Kanana, latou te tautō fo‘i i le ALI‘I o ‘au; o ta‘ua le tasi, o le ‘a‘ai o le malaia.
19. O lea aso e i ai le fatafaitaulaga o le ALI‘I i totonu o le nu‘u o Aikupito ma le fa‘ailoga i le ALI‘I i tafatafa o lona tuā‘oi.
20. E fai ai fo‘i ma fa‘ailoga ma molimau i le ALI‘I o ‘au i le nu‘u o Aikupito; auā latou te ‘alalaga i le ALI‘I ‘ona o ē fa‘asauā, ‘ona ‘auina atu ai lea e ia ‘iā te i latou o le fa‘aola, o lē ‘ua sili, na te lavea‘iina i latou.
21. E fa‘ailoaina e le ALI‘I i Aikupito, e iloa fo‘i le ALI‘I o Aikupito i lea aso; latou te ‘au‘auna ‘iā te ia i taulaga ma mea alofa; latou te tautō fo‘i i le ALI‘I, ma latou fa‘ataunu‘uina.
22. E taia fo‘i Aikupito e le ALI‘I na te taia ma toe fofōina; ‘ona latou liliu ai lea i le ALI‘I, ‘ona fa‘afofoga lea o ia ‘iā te i latou ma fofō ‘iā te i latou.
23. O lea aso e fai ai le ala tele, e fua mai i Aikupito e o‘o i Asuria, e ō atu Asuria i Aikupito, e ō mai fo‘i Aikupito i Asuria; e ‘au‘auna fo‘i Aikupito fa‘atasi ma Asuria.
24. O lea aso e fai ai Isaraelu ma tolu o nu‘u, e fa‘atasi ma Aikupito ma Asuria, e fai ma mea e manuia ai i totonu o le lalolagi.
25. E fa‘amanuia le ALI‘I o ‘au ‘iā te i latou, e fa‘apea mai, “‘Ia manuia lo‘u nu‘u o Aikupito ma Asuria le galuega a o‘u lima, ‘atoa ma lo‘u tofi o Isaraelu.”#