5. Auā sa fa‘aperitomeina le nu‘u uma na ō mai mai Aikupito a o le nu‘u uma na fānau i le vao i le ala ‘ina ‘ua latou ō mai mai Aikupito na lē fa‘aperitomeina i latou.
6. Auā na sāvavali le fānauga a Isaraelu i le vao i tausaga e fagafulu, ‘ua o‘o ‘ina fa‘aumatia le nu‘u uma, o ‘au o le tau‘a, o ē na ō mai mai Aikupito, auā na latou lē fa‘alogo i le si‘ufofoga o le ALI‘I; o i latou na tautō ai le ALI‘I na te lē mafaia ‘ona fa‘ailoa atu ‘iā te i latou le nu‘u na tautō ai le ALI‘I i o latou tamā e foa‘i mai ‘iā te i tatou, o le nu‘u e tafe ai le suāsusu ma le meli.
7. O a latou fānau na fa‘atupuina e ia e fai mo latou sui, na fa‘aperitomeina i latou e Iosua; sa lē peritomeina i latou, auā na latou le fa‘aperitomeina i latou i le ala.
8. ‘Ua uma ‘ona fa‘aperitomeina o le nu‘u uma, ‘ona latou nonofo ai lea i mea e nonofo ai i latou i le toagalauapi, se‘ia mālōlō ai i latou.
9. ‘Ona fetalai mai ai lea o le ALI‘I ‘iā Iosua, “O le aso nei ‘ua ‘ou ‘ave‘eseina ai le luma o Aikupito ‘iā te ‘outou;” o le mea lea ‘ua fa‘aigoa ai le igoa o lea mea o Kilikala, ‘ua o‘o i le aso nei.
10. ‘Ua tolauapi le fānauga a Isaraelu i Kilikala, ma ‘ua latou faia le paseka i le aso e sefulu ma le fa o le masina i le afiafi, i le ‘ele‘ele laugatasi o Ieriko.
11. ‘Ua latou ‘a‘ai fo‘i i mea na tutupu i le fanua i le aso e aupito atu i le paseka, o areto e lē fa‘afefeteina, ma saito tunua i lea lava aso.
12. E lē toe ai ni manai i le aso e aupito ane i le aso na latou ‘a‘ai ai mea na tutupu i le fanua; e le‘i toe maua lava ni manai e le fānauga a Isaraelu; ‘ua latou ‘a‘ai i fua o le lau‘ele‘ele Kanana i lea tausaga.
13. ‘Ua latalata ane Iosua i Ieriko, ‘ua va‘ava‘ai atu o ia, ‘ua iloa atu, fa‘auta, ‘ua tu fa‘afeagai ma ia le tagata o i lona lima lana pelu ‘ua se‘i; ‘ona alu atu ai lea o Iosua ‘iā te ia, ‘ua fa‘apea atu ‘iā te ia, “Pe tatou te ‘au ma i matou, pe ‘e te ‘au ‘ese?”
14. ‘Ona tali mai ai lea o ia, “E leai, a o a‘u, o le ‘ave ‘au a le ALI‘I na ‘ou sau ai nei.”‘Ona fa‘apa‘ū faō ai lea o Iosua i le ‘ele‘ele, ma ifo atu, ‘ua fa‘apea atu ‘iā te ia, “Le ali‘i e, se a se mea ‘e te fetalai mai i lau ‘au‘auna?”