4. ‘Ona tali mai ai lea o Satani i le ALI‘I, ‘ua fa‘apea mai, “O le pa‘u e sui a‘i le pa‘u; o mea uma fo‘i ‘ua i ai i le tagata, e avatua e ia e sui a‘i lona ola.
5. ‘Ae peita‘i ‘ia e ‘a‘apa atu lou ‘a‘ao ma e tago atu i ona ivi ma ona ‘a‘ano, pe na te lē fāifai ai ‘ea ‘iā te oe i ou lava luma?”
6. ‘Ona fetalai atu lea o le ALI‘I ‘iā Satani, “Fa‘auta, o ia o i lou lima, tau o lona ola ‘e te fa‘asaoina.”
7. ‘Ona alu ‘ese ai lea o Satani i luma o le ALI‘I ma na fa‘ao‘o ‘iā Iopu le ma‘i papala leaga, e gata a‘e i ona alofivae, e gata ifo i lona tumua‘i.
8. ‘Ona tago ai lea o Iopu i le ta‘egaipu ‘omea, e valu a‘i ‘iā te ia; ‘ua nofo fo‘i o ia i lalo i le lefulefu.
9. ‘Ona fai mai ai lea o lana avā ‘iā te ia, “‘Ua e tāofi mau pea ‘ea i lau amiotonu? ‘inā fāifai ia e oe o le Atua ma e oti ai.”
10. ‘Ona fai atu ai lea o ia ‘iā te ia, “‘Ua e tautala mai, e pei ‘ona tautala mai o se tasi o le vao fafine valea; ‘ua tatou talia mea lelei mai le Atua, ‘ae tatou te lē talia ‘ea ma mea leaga?” ‘Ua lē agasala Iopu i nei mea uma i ona laugutu.
11. ‘Ua fa‘alogo uō e to‘atolu a Iopu i nei mea leaga uma ‘ua o‘o atu ‘iā te ia, ‘ona latou ō mai ai lea e ta‘ito‘atasi mai lona nu‘u, o Elifasa le Timanu, o Pilitati le Sua ma Sofara le Naama; ‘ua latou filifili ‘ua loto gatasi e ō mai e fa‘amafanafana ‘iā te ia ma fa‘amatalaloto atu ‘iā te ia.
12. Na latou va‘ai mamao atu, ‘ua latou lē iloa o ia; ‘ona latou fētāgisi ai lea ‘ua leo tetele; ‘ua latou ta‘ito‘atasi ma saei lona ‘ofu ma asu a‘e i luga le efuefu i o latou ulu.
13. ‘Ona nonofo ai lea o i latou ma ia i le ‘ele‘ele i ao e fitu ma po e fitu, ‘ae le‘i tautala atu o i latou sina ‘upu ‘iā te ia; auā ‘ua latou iloa, ‘ua matuā tele lava lona tigā.#