15. Auā ‘ua fa‘apea ‘ona fetalai mai o le ALI‘I le Atua o Isaraelu ‘iā te a‘u: ‘Ia e ‘ave le ipu uaina o lo‘u nei ita a‘i lo‘u lima ma fa‘ainu a‘i atu nu‘u uma ‘ou te ‘auina atu ai oe ‘iā te i latou.
16. Latou te feinu ma tautevateva ma fa‘avalea, ‘ona o le pelu ‘ou te ‘auina atu ai ‘iā te i latou.
17. ‘Ona ‘ou talia ai lea o le ipu a‘i le ‘a‘ao o le ALI‘I, ma ‘ou fa‘ainu a‘i atu nu‘u uma na ‘auina i ai a‘u e le ALI‘I;
18. o Ierusalema ma ‘a‘ai o Iuta ma ‘ona tupu, ma ona ali‘i, e faia i latou ‘ua mea gaogao ma mea fa‘atafunaina ma mea e uisa ai, ma fa‘afanoga e pei ‘ona fai i le aso nei.
19. O Farao, o le tupu o Aikupito ma ana ‘au‘auna, ma ali‘i ‘ua ‘iā te ia ma lona nu‘u uma;