1. O Paulo, o lē ‘ua noanoatia ‘ona o Keriso Iesu, o Timoteo fo‘i lo tatou uso. ‘Iā Filemoni o le pele na tatou galulue fa‘atasi;
2. ma Afia lo tatou tuafafine pele ma Arekipa o lē na tatou matata‘u fa‘atasi, ‘atoa ma le ekalesia i lou fale.
3. ‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.
4. ‘Ou te fa‘afetai atu i lo‘u Atua, pe a ‘ou ta‘uta‘ua oe e lē aunoa i a‘u tatalo,
5. ‘ina ‘ua ‘ou fa‘alogo i lou alofa ma le fa‘atuatua i le Ali‘i o Iesu, ‘atoa ma le ‘au pa‘ia uma.
6. ‘Ina ‘ia galue lava le mafuta fa‘atasi i lou fa‘atuatua, ‘ina ‘ia matuā iloa mea lelei uma o ‘iā te i tatou ‘iā Keriso.
7. Auā lo‘u uso e, ‘ua tele lo‘u fiafia ma le mafanafana ‘ona o lou alofa, ‘ina ‘ua fa‘amafanafanaina le ‘au pa‘ia ‘ona o oe.
8. O lenei, e ui lava ‘ina ‘ua ‘ou fa‘amalosi e poloa‘i atu ai ‘iā te oe ‘ona o Keriso, i mea e tatau,
9. ‘ae ‘ou te ‘ai‘oi atu ‘ona o le alofa, o a‘u nei lava o Paulo le toeaina, o lē ‘ua noanoatia nei fo‘i ‘ona o Iesu Keriso.
10. ‘Ou te ‘ai‘oi atu ‘iā te oe mo lo‘u atali‘i o Onesemo, o lē na fānaua e a‘u, a o noanoatia a‘u.
11. Sa lē aogā o ia ‘iā te oe, a o lenei e aogā tele ‘iā te oe ‘atoa ma a‘u.
12. ‘Ou te fa‘afo‘i atu ‘iā te ia; ‘inā e talia mai o ia, o lo‘u lava tino ia.
13. Na ‘ou loto ‘ina ‘ia tāofi pea ‘iā te ia ma te nonofo ma a‘u, ‘ina ‘ia fai mou sui, na te ‘au‘auna mai ‘iā te a‘u i ‘ou noanoataga ‘ona o le tala lelei.
14. A ‘ou te lē fia faia se mea e tasi pe a le tō mai sau pule, ‘ina ne‘i pei o se mea ‘ua fa‘atauānauina lou agalelei mai, a ‘ia faia ma le loto.
15. Auā atonu o le mea lea na te‘a ‘ese ai o ia i sina itū aso, ‘ina ‘ia e toe maua o ia e fa‘avavau;
16. e lē toe fa‘apei o se pologa, ‘ae sili i le pologa, o le uso pele ia ‘iā te a‘u lava; e lē sili ‘ea ‘ona fa‘apea ‘iā te oe i la le tino ‘atoa ma la le Ali‘i.