1. ‘Ona ō atu lea o le fānauga uma a Isaraelu, ma ‘ua fa‘apotopotoina le fa‘apotopotoga i le ALI‘I, i Mesepa, e pei se tagata e to‘atasi, e pau mai i Tanu, e pau mai i Peresepa, ‘atoa ma le nu‘u o Kiliata.
2. ‘Ua tutū ai ali‘i o le nu‘u uma, o itū‘āiga uma o Isaraelu i le fa‘apotopotoga o le nu‘u o le Atua, e fa selau o afe o tagata, o ‘au e sāvavali ē ‘ua fai pelu.
3. (‘Ua fa‘alogo le fānauga a Peniamina, ‘ua ō a‘e le fānauga a Isaraelu i Mesepa.)‘Ona fai atu lea o le fānauga a Isaraelu, “Fai mai ia, pe na fa‘apefea ‘ona faia o lenei mea leaga?”