9. ‘Ona tula‘i lea o le tagata, a latou ō ma lana palake ma lana ‘au‘auna; ‘ua fai mai ‘iā te ia le tamā o lana avā, o le tamā o le teine, “Fa‘auta ‘ea, o le a po lenei aso, o le a afiafi, se‘i tatou momoe; fa‘auta, ‘ua tali po, ‘inā moe ia ‘i‘inei, ma fa‘afiafia lou loto, a e usuusu ‘outou taeao i la ‘outou malaga, ma e alu i lou ‘āiga.”
10. E lē mafai le tagata ‘ona latou momoe, ‘ua tula‘i ma savali; ‘ona o‘o atu lava lea e feagai ma Iepusē, (o Ierusalema fo‘i lea;) sa ‘iā te ia asini e lua ‘ua fa‘anofoaina, ‘ua ‘iā te ia fo‘i lana palake.
11. ‘Ua latalata i latou i Iepuse, ‘ua matuā maulalo ifo le la; ‘ona fai mai lea o le ‘au‘auna i lona ali‘i, “Se‘i tatou ō ma tatou afe ane i lenei ‘a‘ai o Iepuse, ma tatou momoe ai.”
12. A ‘ua fai atu lona ali‘i ‘iā te ia, “‘Aua tatou te afe i le ‘a‘ai o tagata ‘ese, e lē o le fānauga a Isaraelu i latou, ‘ae tatou ō atu ia i Kipea.”
13. ‘Ua fai atu fo‘i i lana ‘au‘auna, “Sau ia, ‘inā tatou fa‘alatalata atu i so ia nu‘u, ma tatou momoe i Kipea, po o Rama.”
14. ‘Ona latou ō loa lea, ‘ua sāvavali; ‘ua goto le lā a o latalata i latou i Kipea o Peniamina.
15. ‘Ona latou afe atu ai lea, ma ulu atu e momoe i Kipea; ‘ua o‘o i ai ‘ona latou nonofo lea i le malae o le ‘a‘ai, a ‘ua leai se tagata na talia i latou i lona fale e momoe ai.
16. Fa‘auta, o le toeaina ‘ua sau mai lana galuega i le vao i le afiafi, o ia fo‘i le tagata mai le mauga o Efaraima, sa āumau o ia i Kipea; a o tagata o le nu‘u o sa, Peniamina i latou.
17. ‘Ua tepa a‘e o ia, ‘ua na iloa le malaga i le malae o le ‘a‘ai. ‘Ona fai mai lea o le toeaina, “Po fea ‘e te alu i ai? maifea fo‘i na e sau ai?”
18. ‘Ua tali atu o ia ‘iā te ia, “Na matou ō mai i Peteleema o Iuta, o le a alu atu i le itū o le mauga o Efaraima, na ‘ou sau ai lea mea, na ‘ou alu i Peteleema o Iuta, a ‘ou te alu nei i le fale o le ALI‘I, ‘ua lē talia a‘u e se tasi i lona fale;
19. a o i ai lava ‘au o saito ma mea e ‘ai a matou asini, ‘atoa ma mea e ‘ai ma uaina ma a‘u, ma lau ‘au‘auna fafine, ma le taule‘ale‘a o lo‘o i la‘u ‘au‘auna, e leai lava se mativa i se mea e tasi.”
20. ‘Ua fai mai le toeaina, “‘Ia manuia oe, tu‘u mai pea, faitalia a‘u i mea uma ‘e te mativa ai, tau lava ‘ina ne‘i e moe i le malae.”
21. ‘Ona ia avatu lea o i latou i lona fale, ‘ua fafaga i asini; ‘ua latou mulumulu i o latou vae, ma latou ‘a‘ai ma inu.
22. Sa fa‘afiafia e i latou o latou loto, fa‘auta o tagata o le nu‘u, o tagata ulavavale ‘ua latou si‘omia le fale o lo‘o patu‘i i le puipui; ‘ua latou fai mai i le tagata e ona le fale, o le toeaina lea, o lo‘o fa‘apea mai, “Tu‘u mai ia le tagata na alu atu i lou fale, ‘ina ‘ia matou iloa o ia.”
23. ‘Ona alu atu lea ‘iā te i latou o le tagata e ona le fale, ‘ua fai atu ‘iā te i latou, “‘Aua, o‘u uso e, ‘aua lava ne‘i ‘outou agaleaga, ‘ina ‘ua ulu mai lenei tagata i lo‘u fale, ‘aua tou te faia lenei mea leaga;
24. fa‘auta, o lo‘u afafine o le taupou, ‘atoa ma lana palake, se‘i ‘ou ‘aumaia i lā‘ua, tou te fa‘aleaga ‘iā i lā‘ua, ma ‘ia faia e ‘outou mea tou te loto i ai ‘iā i lā‘ua; a o lenei tagata, ‘aua tou te faia lenā mea leaga ‘iā te ia.”
25. ‘Ae lē mafafai tagata ‘ona fa‘alogo ‘iā te ia, ‘ona pu‘e atu lea e le tagata i lana palake, ‘ua na tu‘u atu ai o ia ‘iā te i latou i fafo; ‘ua latou iloa o ia, ma latou fa‘aleaga ‘iā te ia ‘ua ‘atoa lava le po; ‘ua o‘o i le taeao, ‘ona latou tu‘u atu lea ‘iā te ia e alu ‘ina a malama a‘e le taeao.