4. ‘Ona tāofia lea o ia e le tamā o lana avā, o le tamā o le teine, ‘ua la nonofo ma ia i aso e tolu; ‘ua latou ‘a‘ai ma inu, ma latou momoe ai.
5. ‘Ona o‘o lea i le aso fa, ‘ua vave ala lava ia i le taeao, ‘ua tula‘i a alu. ‘Ona fai mai lea o le tamā o le teine i le tane a lona afafine, “‘Ia e fa‘amalosi lou loto i sina mea e ‘ai, ‘ona lua ō ai lea.”
6. ‘Ona la nonofo ai lea, ‘ua ‘a‘ai ma inu fa‘atasi i lā‘ua, auā na fai atu le tamā o le teine i le tagata, “‘Ia e loto mai ‘ona tatou momoe, ma e fa‘afiafia lou loto.”
7. ‘Ona tula‘i lea o le tagata e alu; ‘ona pulunaunau lea ‘iā te ia o le tamā o lana avā, ‘ona nofo ai lea, ‘ua toe moe ai.
8. ‘Ona vave ala lea o ia i le taeao o le aso lima, o le a alu; ‘ona fai mai lea le tamā o le teine, “‘Ia e fa‘amalosi lou loto;” ‘ona fa‘atuatuai lea o i lā‘ua, ‘ua o‘o i le fāliu o le la; sa la ‘a‘ai fa‘atasi.
9. ‘Ona tula‘i lea o le tagata, a latou ō ma lana palake ma lana ‘au‘auna; ‘ua fai mai ‘iā te ia le tamā o lana avā, o le tamā o le teine, “Fa‘auta ‘ea, o le a po lenei aso, o le a afiafi, se‘i tatou momoe; fa‘auta, ‘ua tali po, ‘inā moe ia ‘i‘inei, ma fa‘afiafia lou loto, a e usuusu ‘outou taeao i la ‘outou malaga, ma e alu i lou ‘āiga.”
10. E lē mafai le tagata ‘ona latou momoe, ‘ua tula‘i ma savali; ‘ona o‘o atu lava lea e feagai ma Iepusē, (o Ierusalema fo‘i lea;) sa ‘iā te ia asini e lua ‘ua fa‘anofoaina, ‘ua ‘iā te ia fo‘i lana palake.
11. ‘Ua latalata i latou i Iepuse, ‘ua matuā maulalo ifo le la; ‘ona fai mai lea o le ‘au‘auna i lona ali‘i, “Se‘i tatou ō ma tatou afe ane i lenei ‘a‘ai o Iepuse, ma tatou momoe ai.”
12. A ‘ua fai atu lona ali‘i ‘iā te ia, “‘Aua tatou te afe i le ‘a‘ai o tagata ‘ese, e lē o le fānauga a Isaraelu i latou, ‘ae tatou ō atu ia i Kipea.”
13. ‘Ua fai atu fo‘i i lana ‘au‘auna, “Sau ia, ‘inā tatou fa‘alatalata atu i so ia nu‘u, ma tatou momoe i Kipea, po o Rama.”
14. ‘Ona latou ō loa lea, ‘ua sāvavali; ‘ua goto le lā a o latalata i latou i Kipea o Peniamina.
15. ‘Ona latou afe atu ai lea, ma ulu atu e momoe i Kipea; ‘ua o‘o i ai ‘ona latou nonofo lea i le malae o le ‘a‘ai, a ‘ua leai se tagata na talia i latou i lona fale e momoe ai.
16. Fa‘auta, o le toeaina ‘ua sau mai lana galuega i le vao i le afiafi, o ia fo‘i le tagata mai le mauga o Efaraima, sa āumau o ia i Kipea; a o tagata o le nu‘u o sa, Peniamina i latou.
17. ‘Ua tepa a‘e o ia, ‘ua na iloa le malaga i le malae o le ‘a‘ai. ‘Ona fai mai lea o le toeaina, “Po fea ‘e te alu i ai? maifea fo‘i na e sau ai?”