7. E fa‘amū fo‘i e Arona i ona luga o mea manogi i taeao uma lava pe a teuteu e ia o lamepa, ia fa‘amū ai le mea manogi.
8. Pe a tutu fo‘i e Arona o lamepa i le afiafi, ‘ia fa‘amū ai e ia o mea manogi; o le mea manogi i luma o le ALI‘I e lē aunoa i o ‘outou tupulaga amulī.
9. ‘Aua tou te fa‘amū ai mea manogi ‘ese, po o taulaga mū, po o taulaga i mea e ‘ai; ‘aua fo‘i tou te sasa‘a i ai ni taulaga i mea e inu.
10. E faia fo‘i e Arona i luga o nifo o le fata o le togiola i le toto o taulaga mo le agasala e togiola a‘i, ‘ia ta‘itasi i tausaga; e faia e ia o le togiola i o ‘outou tupulaga amulī, ‘ia ta‘itasi i tausaga; e sili ‘ona pa‘ia lea mea i le ALI‘I.
11. ‘Ua fetalai mai fo‘i le ALI‘I ‘iā Mose, ‘ua fa‘apea mai:
12. A e faitau i le fānauga a Isaraelu, e fa‘atatau i ē ‘ua tatau ‘ona faitauina, ‘ia latou ta‘itasi ma ‘aumai o latou togiola i le ALI‘I, pe a faitauina i latou, ne‘i o‘o se mala ‘iā te i latou pe a faitauina i latou.
13. O lenei le mea latou te ta‘itasi ma ‘aumai, ē ‘ua faitaulia, o le vaeluaga o le sekeli, o le sekeli lea o le malumalu; (e luafulu o kire o le sekeli lea;) o le vaeluaga o le sekeli o le taulaga lea i le ALI‘I.
14. E ta‘ito‘atasi uma o ē faitaulia, e āfua mai i ē ‘ua luafulu o latou tausaga, ‘atoa ma ē ‘ua matutua ai, e avatu e i latou o le taulaga i le ALI‘I.
15. ‘Aua le fa‘atele e le tagata mau‘oa; ‘aua fo‘i le fa‘aitiitia e le tagata mativa, na o le vaeluaga o le sekeli lava, pe a latou avatu le taulaga i le ALI‘I, e fai mo ‘outou togiola.
16. ‘Ia e ‘ave fo‘i tupe e togiola a‘i le fānauga a Isaraelu, ma ‘ia e ‘aumaia e fai a‘i sauniga i le fale fetāfa‘i o le fa‘apotopotoga ‘ina ‘ia faia i le fānauga a Isaraelu ma fa‘amanatuga i luma o le ALI‘I, e fai a‘i o ‘outou togiola.
17. ‘Ua fetalai mai fo‘i le ALI‘I ‘iā Mose, ‘ua fa‘apea mai,
18. ‘E te faia le tanoa ‘apamemea, ma ona tulaga i le ‘apamemea, e mulumulu ai; ‘e te tu‘uina fo‘i i le vā o le fale fetāfa‘i o le fa‘apotopotoga ma le fatafaitaulaga; ‘e te sasa‘a i ai le vai;
19. e mulumulu ai Arona ma ona atali‘i o latou lima ‘atoa ma o latou vae.
20. A latou ō i le fale fetāfa‘i o le fa‘apotopotoga ia latou mulumulu i le vai, ne‘i latou oti; pe a latou fa‘alatalata fo‘i i le fatafaitaulaga, latou te ‘au‘auna ai e susunu ai le taulaga e fai i le afi i le ALI‘I.
21. ‘Ia latou mulumulu fo‘i o latou lima ma o latou vae, ne‘i latou oti; e fai fo‘i ma tulafono e fa‘avavau ‘iā i latou, o ia ma lana fānau i o latou tupulaga amulī.
22. ‘Ua fetalai mai fo‘i le ALI‘I ‘iā Mose, ‘ua fa‘apea mai: