12. Na āua‘i ‘ona solo ta‘ito‘atasi o teine i lo latou ō atu i le tupu o Asueru ‘ina ‘ua ‘ato‘atoa masina e sefulu ma le lua, e tusa ma le tulafono i fafine; auā na fa‘apea ‘ona ‘ato‘atoa ai o aso o le fa‘amamāina o i latou; o masina e ono e u‘u ai i le suāu‘u muro ma masina e ono i mea manogi ma mea e fa‘amamāina a‘i fafine.
13. ‘Ua fa‘apea fo‘i ‘ona alu atu o le teine i le tupu; na avatua ‘iā te ia mea uma na ia fai atu ai e alu ai ma ia mai le fale o fafine i le fale o le tupu.
14. O le afiafi na alu atu ai o ia, o le taeao fo‘i na toe fo‘i ai i le lua o fale o fafine ‘iā Sasekasa le eunuka a le tupu, o le leoleo i palake; na ia le toe alu atu i le tupu, vaganā ‘ona fiafia o le tupu ‘iā te ia, ma ‘ua vala‘auina lona igoa.
15. ‘Ua o‘o fo‘i ‘iā Eseta le afafine o Aviaila le uso o le tamā o Moretekai, o lē na faia o ia mōna afafine, ‘ona alu atu i le tupu, e le‘i fai atu ai o ia i se mea ‘ua na o mea na fai atu ai Hege le eunuka a le tupu, o le tausi fafine. ‘Ua alofagia fo‘i Eseta e i latou uma ē na iloa o ia.
16. ‘Ua ‘avea Eseta i le tupu o Asueru i le fale o le tupu i le sefulu o masina, o le masina lea o Tapeta, i le fitu o tausaga o lana nofoa‘iga.
17. ‘Ua sili fo‘i le mana‘o o le tupu ‘iā Eseta i fafine uma, ‘ua sili fo‘i ‘ona alofaina ma fa‘apelepeleina o ia e ia i taupou uma; ‘ona ia tu‘u atu ai lea o le paleali‘i i lona ulu ma fai o ia ma masiofo e sui a‘i Vasati.
18. ‘Ona faia lea e le tupu o le tausamiga tele ma ali‘i uma ‘ua ‘iā te ia ma ana ‘au‘auna, “O le tausamiga ‘ona o Eseta;” na ia tu‘uina atu ia mālōlō tagata o itū mālō, na ia foa‘i atu fo‘i mea alofa e pei ‘ona tatau i le tupu.
19. ‘Ua nofo Moretekai i le faitoto‘a o le tupu, ‘ina o fa‘apotopotoina fa‘alua o taupou.
20. E le‘i fa‘ailoa atu e Eseta lona ‘āiga po o lona nu‘u; e pei ‘ona fai atu ai Moretekai ‘iā te ia; auā na faia e Eseta mea na fai atu ai Moretekai, e pei ‘ona ia faia ‘ina o tausia o ia e ia.
21. O ona po ia ‘ina o nofo Moretekai i le faitoto‘a o le tupu, na ita ai Piketano ma Tirese, o eunuka ia e to‘alua a le tupu, o ē na leoleo i le faitoto‘a, na la fia fa‘ao‘o fo‘i o la lima i le tupu o Asueru.
22. ‘Ua iloa le mea e Moretekai, ‘ona ia fa‘ailoa atu lea i le masiofo o Eseta; ‘ona ta‘u atu ai lea e Eseta i le tupu i le igoa o Moretekai.
23. ‘Ua su‘esu‘eina le mea, ‘ona iloa lea; ‘ona fa‘atautauina ai lea o i lā‘ua i le la‘au. Na tusia ai fo‘i i luma o le tupu i le tusi o tala i nofoa‘iga.