18. O lona toe e tuā‘oi ma le taulaga o le tofi pa‘ia, e sefulu afe lona umi i sasa‘e, e sefulu afe fo‘i i sisifo, e feagai fo‘i ia ma le taulaga o le tofi pa‘ia; o mea e tutupu ai e fai lea ma mea e ‘ai mā e ‘au‘auna i le ‘a‘ai.
19. O ē ‘au‘auna i le ‘a‘ai latou te ‘au‘auna i ai mai itū‘āiga uma o Isaraelu.
20. O le taulaga ‘atoa, e lua sefulu afe ma afe e lima i le tasi itū, e lua sefulu afe fo‘i ma afe e lima i le isi itū; tou te avatu le taulaga pa‘ia e gatasitasi uma ona itū e fa, e fa‘atasi ma le tofi o le ‘a‘ai.
21. E fai fo‘i le mea ‘ua toe mo le ali‘i sili i le tasi itū ma le isi itū o le taulaga pa‘ia ma le tofi o le ‘a‘ai i luma o le lua sefulu afe ma afe e lima o le taulaga i le tuā‘oi i le itū i sasa‘e, ma le itū i sisifo i luma o le lua sefulu afe ma afe e lima i le tuā‘oi i le itū i sisifo, e feagai ma tofi o le ali‘i sili; e fai fo‘i ia ma taulaga pa‘ia; e tu loto ai le malumalu o le fale.
22. E pau mai i le tofi o sa Levī, e pau mai fo‘i i le tofi o le ‘a‘ai, (e i ai le tofi o le ali‘i sili,) i le vā o le tuā‘oi o Iuta ma le tuā‘oi o Peniamina, e fai lea mo le ali‘i sili.
23. O itū‘āiga fo‘i o totoe, e pau mai i le itū i sasa‘e, e pau mai i le itū i sisifo, o le tofi lea o Peniamina.
24. E so‘o fo‘i tuā‘oi ma Peniamina, e pau mai i le itū i sasa‘e e pau mai i le itū i sisifo, o le tofi lea o Simeona.
25. E so‘o fo‘i tuā‘oi ma Simeona, e pau mai i le itū i sasa‘e, e pau mai i le itū i sisifo, o le tofi lea o Isakara.
26. E so‘o fo‘i tuā‘oi ma Isakara, e pau mai i le itū i sasa‘e, e pau mai i le itū i sisifo, o le tofi lea o Sepulona.
27. E so‘o fo‘i tuā‘oi ma Sepulona, e pau mai i le itū i sasa‘e, e pau mai i le itū i sisifo, o le tofi lea o Kato.
28. E so‘o fo‘i tuā‘oi ma Kato i le itū i saute, e fa‘asaga i le itū i saute, e pau mai i le tuā‘oi i Tamara, e pau mai i le vai o Meripa-Katesa ma le alia e o‘o i le sami tele.
29. O le lau‘ele‘ele lea tou te vaevaeina i le vili i itū‘āiga o Isaraelu e fai ma tofi, o latou tofi fo‘i ia, ‘ua fetalai mai ai le Ali‘i le ATUA.
30. O mea ia e ō atu ai le ‘a‘ai; o le itū i matū e fa afe ma le lima selau o lona fua lea.
31. O puipui fo‘i o le ‘a‘ai e igoa ia i igoa o itū‘āiga o Isaraelu; e tolu puipui i le itū i matū; o le puipui o Reupena o le tasi lea, o le puipui o Iuta o le tasi lea, o le puipui o Levī o le tasi lea.
32. O le itū i sasa‘e e fa gaafe ma le lima o selau o lona fua lea; e tolu fo‘i puipui; o le puipui o Iosefa o le tasi lea, o le puipui o Peniamina o le tasi lea, o le puipui o Tanu o le tasi lea.