17. O taulele‘a o Avane ma Pepeseta e oti i latou i le pelu;e tāfea fo‘i ia nu‘u.
18. E fa‘apouliuligia fo‘i le ao i Tapenesa,pe a ‘ou gausia amo a Aikupito i lea mea,e fa‘ai‘uina fo‘i lona malosi e mitamita ai;e ufitia ia i le ao, o ana tama, fafine fo‘i e tāfea i latou.
19. ‘Ou te fa‘ao‘o lava le sala i Aikupito;‘ona latou iloa ai lea o a‘u lava o le ALI‘I.
20. O lona tausaga e sefulu ma le tasi, o le masina muamua, o le aso e fitu o le masina, na o‘o mai ai le afioga a le ALI‘I ‘iā te a‘u, ‘ua fa‘apea mai:
21. Le atali‘i e o le tagata, ‘ua ‘ou gausia le lima o Farao le tupu o Aikupito; fa‘auta fo‘i, e le fusia ia mālōlō ai; e le avane fo‘i i ai se fusi e fusi ai ‘ia malosi ai e u‘u ai le pelu.
22. O le mea lea ‘ua fa‘apea ‘ona fetalai mai ai o le Ali‘i le ATUA, Fa‘auta, ‘ou te faia Farao le tupu o Aikupito mo‘u fili, ‘ou te gagauina ona lima, o le ‘ua malosi, ‘atoa ma le na gagauina; ‘ou te fa‘apa‘ūina fo‘i le pelu ai lona lima.
23. ‘Ou te fa‘ata‘ape‘apeina fo‘i Aikupito i nu‘u, ‘ou te fa‘asalalauina fo‘i i latou i nu‘u ‘ese‘ese.
24. ‘Ae ‘ou te fa‘amalosia fo‘i lima o le tupu o Papelonia ma ‘ou tu‘u ane la‘u pelu i lona lima; ‘ae ‘ou te gagauina lima o Farao, ‘ona ōi ai lea o ia i ona luma, i le ōi o lē ‘ua manu‘a.
25. ‘Ae ‘ou te fa‘amalosia lima o le tupu o Papelonia, a o lima o Farao e gagase lava ia; latou te iloa ai o a‘u o le ALI‘I, pe a ‘ou tu‘u atu la‘u pelu i le lima o le tupu o Papelonia, ‘ae fa‘aloaloa atu ai e ia i le nu‘u o Aikupito.