1. ‘Ua ō mai fo‘i ‘iā te a‘u nisi toeaina o Isaraelu, ‘ua nonofo mai i o‘u luma.
2. ‘Ona o‘o mai lea o le afioga a le ALI‘I ‘iā te a‘u, ‘ua fa‘apea mai:
3. Le atali‘i e o le tagata, ‘ua fa‘atūina e ia tagata o a latou tupua i o latou loto ma ‘ua tu‘uina i o latou luma la latou agasala e tausuai ai; latou te fesili mai ‘ea ‘iā te a‘u?
4. O le mea lea ‘ia e tautala atu ai ‘iā te i latou, ma fai atu ‘iā te i latou, O lo‘o fa‘apea ‘ona fetalai mai o le Ali‘i le ATUA: ‘Ai se tagata o le ‘āiga o Isaraelu na te fa‘atūina ana tupua i lona loto ma tu‘uina i ona luma lana agasala e tausuai ai ma alu ane i le perofeta; o a‘u o le ALI‘I, ‘ou te tali atu i lē alu ane, e tusa ma le tele o ana tupua;
5. ‘ina ‘ia maua le ‘āiga o Isaraelu i o latou lava loto, auā ‘ua ō ‘ese i latou uma ‘iā te a‘u ‘ona o a latou tupua.
6. O le mea lea ‘ia e fai atu ai i le ‘āiga o Isaraelu, O lo‘o fa‘apea ‘ona fetalai mai o le Ali‘i le ATUA, Liliu mai ia, ‘inā liliu ‘ese ‘iā ‘outou tupua, ‘ia liliu ‘ese o ‘outou mata ‘iā ‘outou mea ‘inosia uma.
7. Auā ai se tagata o le ‘āiga o Isaraelu, po o se tagata ‘ese o āumau i Isaraelu, na te alu ‘ese ‘iā te a‘u ma fa‘atūina ana tupua i lona loto ma tu‘uina i ona luma lana agasala e tausuai ai ma alu ane i le perofeta e fesili atu ai ‘iā te a‘u, o a‘u o le ALI‘I, o a‘u lava, ‘ou te tali atu ‘iā te ia.
8. ‘Ou te fai lenā tagata mo‘u fili, ‘ou te fai fo‘i o ia ma fa‘ailoga ma ‘upu fa‘atusa, ‘ou te vavae‘eseina fo‘i o ia i lo‘u nu‘u; tou te iloa ai o a‘u lava o le ALI‘I.
9. ‘Ae ‘āfai e sesē se perofeta i se ‘upu ‘ua ia fai atu ai, o a‘u o le ALI‘I ‘ua ‘ou fa‘asesēina lenā perofeta, ‘ou te fa‘aloaloa atu fo‘i lo‘u lima ‘iā te ia, ma fa‘aumatia o ia a‘i lo‘u nu‘u o Isaraelu.
10. E taui atu lava a latou agasala; e tusa le taui o le perofeta ma le taui o lē fesili ‘iā te ia;
11. ‘ina ‘ia lē toe sesē le ‘āiga o Isaraelu i lo latou ō ‘ese ‘iā te a‘u ma ia le toe leaga i latou i o latou solitulafono uma; a ‘ia fai i latou mo‘u nu‘u ma ia fai a‘u mo latou Atua, ‘ua fetalai mai ai le Ali‘i le ATUA.
12. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
13. Le atali‘i e o le tagata, a agasala mai se nu‘u ‘iā te a‘u ‘ina ‘ua matuā amio leaga lava ma ‘ou fa‘aloaloa atu i ai lo‘u lima ma gausia le to‘oto‘o o lana mea e ‘ai ma tu‘u atu ai le oge ma fa‘aumatia tagata ‘atoa ma manu o i ai;
14. ana i ai tagata ia e to‘atolu, o Noa, o Tanielu, ma Iopu, e lavea‘iina e i latou na o latou lava ola i la latou amiotonu, ‘ua fetalai mai ai le Ali‘i le ATUA.
15. ‘Āfai ‘ou te tu‘uina atu manu fe‘ai e ui ai i le nu‘u ma fa‘aumatia ai tagata, ‘ia gaogao ma ‘ia lē toe uia ‘ona o manu;
16. ana i ai ia tagata e to‘atolu, ‘ua fetalai mai ai le Ali‘i le ATUA, o lo‘o ola a‘u, e lē lavea‘iina e i latou o atali‘i, po o afafine, na o i latou lava e lavea‘iina, ‘ae fa‘agaogaoina lava le nu‘u.
17. ‘Āfai fo‘i ‘ou te fa‘ao‘o atu le pelu i lenā nu‘u ma ‘ou fai atu, “Le pelu e, ‘inā ui atu ia i le nu‘u;” ‘ou te fa‘aumatia ai tagata ‘atoa ma manu;
18. ana i ai ia tagata e to‘atolu, ‘ua fetalai mai ai le Ali‘i le ATUA, o lo‘o ola a‘u, latou te lē lavea‘iina o atali‘i po o afafine, na o i latou lava e lavea‘iina.
19. ‘Āfai fo‘i ‘ou te tu‘u atu i lenā nu‘u se fa‘ama‘i ma ‘ou sasa‘aina atu i ai lo‘u ita tele i le fa‘amaligi o toto, e fa‘aumatia ai tagata ‘atoa ma manu;
20. ana i ai o Noa ma Tanielu ma Iopu, ‘ua fetalai mai ai le Ali‘i le ATUA, o lo‘o ola a‘u, e lē lavea‘iina i latou se atali‘i, po o se afafine; latou te lavea‘iina na o latou lava ola i la latou amiotonu.
21. O le mea lea ‘ua fa‘apea ‘ona fetalai mai ai o le Ali‘i le ATUA: E le atili ai ‘ea pe a ‘ou tu‘uina atu i Ierusalema sala ogo e fa ‘ua ‘iā te a‘u, o le pelu ma le oge ma le manu fe‘ai ma le fa‘ama‘i e fa‘aumatia ai tagata ‘atoa ma manu?
22. Fa‘auta fo‘i, e fa‘asaoina i ai si ‘ona toe, e ta‘ita‘iina atu ai i latou, o atali‘i ‘atoa ma afafine; fa‘auta, e ō mai i latou ‘iā te ‘outou, e iloa e ‘outou a latou amio ma a latou mea e fai; ‘ona fa‘amafanafanaina ai lea o ‘outou i le leaga ‘ua ‘ou fa‘ao‘o i Ierusalema, ‘atoa uma fo‘i mea ‘ua ‘ou fa‘ao‘o i ai.
23. Latou te fa‘amafanafana ‘iā te ‘outou pe a ‘outou iloa a latou amio ma a latou mea e fai; ‘ona ‘outou iloa ai lea, ‘ou te le‘i fai fua mea uma na ‘ou fai i ai, o lo‘o fetalai mai ai le Ali‘i le ATUA.#