2. ‘Ua ia fa‘apea mai:E leo tele mai le ALI‘I mai Siona,e tulei ifo fo‘i lona si‘ufofoga mai Ierusalema.E fa‘anoanoa fo‘i mea e tata‘a ai manu a ē fagamanu,e mago fo‘i le tumutumu o Karamelu.
3. O lo‘o fa‘apea mai le ALI‘I: E tolu agasala a Tamaseko, e fa fo‘i, ‘ou te lē liliu ‘ese ai lana sala; auā na latou solia ‘iā Kiliata i u‘amea e soli ai saito.
4. ‘Ae ‘ou te tu‘uina atu le afi i le fale o Asaeli, e fa‘aumatia ai fo‘i maota o Peniata.
5. ‘Ou te gauia fo‘i le fa‘amaufa‘alava o Tamaseko, ‘ou te fa‘aumatia lē ‘ua mau i le vanu o Avene, ‘atoa ma lē ‘ua u‘u le to‘oto‘o i Pete-etena; e tāfea fo‘i le nu‘u o Suria i Kira, o lo‘o fetalai mai ai le ALI‘I.
6. O lo‘o fa‘apea mai le ALI‘I: E tolu agasala a Kasa, e fa fo‘i, ‘ou te lē liliu ‘ese ai lana sala; auā na latou fa‘atāfeaina le tāfeaga ‘ato‘atoa ‘ia tu‘uina atu ai i Etoma.
7. ‘Ae ‘ou te tu‘uina atu le afi i le pā o Kasa, e fa‘aumatia ai ona maota.
8. ‘Ou te fa‘aumatia fo‘i lē ‘ua mau i Asetota, ma lē ‘ua u‘u le to‘oto‘o i Asekelona; ‘ou te liliu atu lo‘u lima i Ekerona, e fano ē ‘ua totoe o Filisitia, o lo‘o fetalai mai ai le Ali‘i le ATUA.
9. O lo‘o fa‘apea mai le ALI‘I: E tolu agasala a Turo, e fa fo‘i, ‘ou te lē liliu ‘ese ai lana sala; auā na latou tu‘uina atu le tāfeaga ‘ato‘atoa i Etoma, mōna ‘ua lē manatua le feagaiga a uso.
10. ‘Ae ‘ou te tu‘uina atu le afi i le pā o Turo, e fa‘aumatia ai ona maota.
11. O lo‘o fa‘apea mai le ALI‘I: E tolu agasala a Etoma, e fa fo‘i, ‘ou te lē liliu ‘ese ai lana sala; auā na ia tuliloa i le pelu lona uso, na ia le alofa lava, na saei pea lava lona ita; na ia tausi pea lava lona ita tele.
12. ‘Ae ‘ou te tu‘uina atu le afi i Timanu, e fa‘aumatia ai maota o Posara.