22. ‘Ua iloa Ieu e Ioramo, ‘ona fai atu ai lea o ia, “Ieu e, e filemū ‘ea?”‘Ona fai mai ai lea o ia, “Se a se filemū, ‘ona lē ‘ua tele ‘ea o faita‘aga a lou tinā o Iesepela ma ana togafiti fa‘ataulāitu?”
23. ‘Ona liliu ai lea o Ioramo ma sola, ‘ua fa‘apea atu ‘iā Aasaia, “Aasaia e, o le fouvale le mea nei.”
24. ‘Ona meme‘i gase lea e Ieu o le ‘aufana, ‘ua fana ‘ua lavea ai Ioramo, i le vaitau‘au, ‘ua ati le ū i lona fatu; ‘ona pa‘ū ai lea o ia i totonu o lona kariota.
25. ‘Ona fai atu ai lea o Ieu ‘iā Pitika o lana ‘ave ‘au, “‘Inā ‘ava‘e ia o ia; ‘inā lafo i le fāsi fanua o Napota le Isereelu, auā ‘ia e manatua sa tā ō to‘alua o ti‘eti‘e i le kariota ma mulimuli atu i lona tamā o Aapo, ‘ona tu‘uina atu ai lea e le ALI‘I o lenā avega ‘iā te ia;