2. O le sefulu ma le ono o ona tausaga na fai ai o ia ma tupu, e limagafulu ma le lua o tausaga na fai ai o ia ma tupu i Ierusalema. O le igoa fo‘i o lona tinā o Iekalia, o le Ierusalema ia.
3. Na ia faia le amiotonu i luma o le ALI‘I e tusa ma mea uma na faia e Amasia lona tamā.
4. A ‘ona le‘i ‘ave‘eseina o mea maualuluga; na fai pea taulaga e le nu‘u ma fa‘amū mea manogi i mea maualuluga.
5. Na taia fo‘i le tupu e le ALI‘I, ‘ua ‘avea ai ia ma lepela ‘ua o‘o lava i le aso na ia oti ai; na fale‘esea fo‘i o ia. A ‘ua pule Iotama le atali‘i o le tupu i le ‘āiga, ‘ua na fa‘amasino tagata o le nu‘u.
6. O toe o mea na faia e Asaraia ma mea uma na ia faia, e le‘i tusia ‘ea i le tusi o tala i nofoa‘iga a tupu o Iuta?
7. ‘Ua ta‘oto fo‘i Asaraia fa‘atasi ma ona tamā, ‘ua latou tanu fo‘i ‘iā te ia fa‘atasi ma ona tamā, i le ‘a‘ai o Tavita; ‘ona soloa‘i ane ai lea o lona atali‘i o Iotama e fai ma tupu.
8. O le tolugafulu ma le valu o tausaga o Asaraia le tupu o Iuta na fai ma tupu Sakaria le atali‘i o Ierepoamo ‘iā Isaraelu i masina e ono i Samaria.
9. Na ia faia le amio leaga i luma o le ALI‘I, fa‘apei ‘ona faia e ona tamā; na lē te‘a ‘ese lava ia i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu.
10. ‘Ua fōua fo‘i o ia e Saluma le atali‘i o Iapese, ‘ua na fasi ‘iā te ia i luma o le nu‘u, ‘ua fasioti fo‘i ‘iā te ia; ‘ona fai ai lea o ia ma tupu ‘ua sui a‘i o ia.
11. O toe o mea na faia e Sakaria, fa‘auta, ‘ua tusia i le tusi o tala i nofoa‘iga a tupu o Isaraelu.
12. O le afioga lea a le ALI‘I na tulei atu ‘iā Ieu, ‘ua fa‘apea atu, “E nonofo ou atali‘i i le nofoāli‘i o Isaraelu e o‘o i le fa o augātagata. Na fa‘apea lava ‘ona taunu‘u.”