15. ‘Ona fai atu lea o Hilikia, ‘ua fa‘apea atu ‘iā Safana le tusi‘upu, “‘Ua ‘ou maua le tusi o le tulafono i le fale o le ALI‘I.” ‘Ona tu‘uina atu ai lea e Hilikia o le tusi ‘iā Safana.
16. ‘Ona ‘ave ai lea o le tusi e Safana i le tupu ma ‘ua ‘aumai le tala i le tupu, ‘ua fa‘apea mai, “O galuega uma na e tu‘uina atu ai i au ‘au‘auna, o lo‘o latou faia lava.
17. ‘Ua sasa‘aina e i latou o tupe na maua i le fale o le ALI‘I ma ‘ua latou tu‘uina atu ai i ē pule ma lima o ē fai galuega.”
18. ‘Ona fai mai lea o Safana le tusi‘upu i le tupu, ‘ua fa‘apea mai, “‘Ua ‘aumai ‘iā te a‘u e Hilikia le ositaulaga le tusi.” ‘Ona faitau ai lea e Safana i luma o le tupu.
19. ‘Ua fa‘alogo le tupu i ‘upu o le tulafono, ‘ona ia saei ai lea o ona ‘ofu.
20. ‘Ona fai atu lea o le tupu ‘iā Hilikia ma Aikamo le atali‘i o Safana ma Apetonu le atali‘i o Mika ma Safana le tusi‘upu ma Asaia le ‘au‘auna a le tupu, ‘ua fa‘apea atu,
21. “‘Inā ō ia, ‘inā fesili i le ALI‘I mo a‘u ma ē o totoe i Isaraelu ma Iuta i ‘upu o le tusi ‘ua maua; auā ‘ua tele le to‘asā o le ALI‘I ‘ua liligi ifo ‘iā te i tatou, ‘ina ‘ua lē ‘ana‘ana o tatou tamā i le afioga a le ALI‘I, e fai mea uma ‘ua tusia i lenei tusi.”
22. ‘Ona ō atu ai lea o Hilikia ma i latou na tofia e le tupu, ‘iā Ulata le perofeta fafine, o le avā a Saluma le atali‘i o Tikeva le atali‘i ia o Areasa o lē tausi i ‘ofu; (sa nofo fo‘i o ia i Ierusalema i le mea ‘ua ta‘ua o le lua o ‘a‘ai;) ma ‘ua latou tautala ma ia i lenei mea.
23. ‘Ona tali mai lea o ia ‘iā te i latou, “O lo‘o fa‘apea ‘ona fetalai mai o le ALI‘I le Atua o Isaraelu: ‘Ia ‘outou fai atu i le tagata na ‘a‘auina mai ‘outou ‘iā te a‘u,
24. o lo‘o fa‘apea ‘ona fetalai mai o le ALI‘I: Fa‘auta, o le a a‘u ‘aumai le leaga i lenei mea ma ē nonofo ai, o fetu‘u uma ‘ua tusia i le tusi na faitauina atu e i latou i luma o le tupu o Iuta;
25. auā ‘ua latou tu‘ua a‘u, ‘ae fa‘amū mea manogi i atua ‘ese, ‘ina ‘ia latou fa‘a‘ono‘ono mai ‘iā te a‘u i galuega uma a o latou lima; o lea e liligi ai lo‘u ita i lenei mea, e lē tineia lava.
26. A o le tupu o Iuta na ‘a‘auina mai ‘outou e fesili i le ALI‘I, ‘ia fa‘apea ‘ona ‘outou fai atu ‘iā te ia: O lo‘o fa‘apea ‘ona fetalai mai o le ALI‘I le Atua o Isaraelu i ‘upu na e fa‘alogo ai;
27. auā sa vaivai lou loto ma ‘ua e fa‘amaulalo i luma o le Atua, ‘ina ‘ua e fa‘alogo i ana ‘upu i lenei mea, ma ē nonofo ai ma ‘ua e fa‘amaulalo i o‘u luma, ma ‘ua e saei i ou ‘ofu ma ‘ua e tagi i o‘u luma; o lo‘o fetalai mai le ALI‘I, ‘Ua ‘ou fa‘alogo ai lava.
28. Fa‘auta, ‘ou te fa‘atasiina atu oe i ou tamā, e o‘o atu fo‘i oe i lou tu‘ugamau ma le filemū; ‘ae lē iloa e ou mata le malaia uma ‘ou te fa‘ao‘o mai i luga o lenei mea ma luga o ē nonofo ai.”‘Ona latou ‘aumai ai lea o le ‘upu i le tupu.
29. ‘Ona alu lea o le fe‘au a le tupu ma ‘ua fa‘apotopotoina toeaina uma o Iuta ma Ierusalema.
30. ‘Ona alu a‘e ai lea o le tupu i le fale o le ALI‘I, o ia ma tagata uma o Iuta ma ē ‘ua nonofo i Ierusalema ma le ‘au ositaulaga ma sa Levī ma le nu‘u uma, o ē matutua ‘atoa ma tamaiti; ‘ona faitau atu lea e ia, o latou o fa‘alogologo ai, i ‘upu uma o le tusi o le feagaiga na maua i le fale o le ALI‘I.
31. ‘Ua tu fo‘i le tupu i le tulaga ma ‘ua osi le feagaiga i luma o le ALI‘I, e mulimuli i le ALI‘I ma tausi i ana poloa‘iga ma ana tulafono, ‘atoa ma ana sauniga, i lona loto ‘atoa, ma lona agaga ‘atoa, ma usiusita‘i i ‘upu o le feagaiga ‘ua tusia i lenei tusi.