1. A o Makapaio ma i latou sa fa‘atasi ma ia, ‘ua latou toe maua, i le fesoasoani mai a le Ali‘i, o le malumalu ma le ‘a‘ai.
2. ‘Ua na lepetia o fatafaitaulaga sa atiina a‘e solo e nu‘u ‘ese i auala, ‘ua na tātu‘u fo‘i i lalo o togāla‘au a tupua;
3. ma ‘ua latou fa‘amamāina le malumalu, ‘ona latou ati a‘e lea se fatafaitaulaga fou ma ‘ua latou maua mai le afi i le oloina o ma‘a, ‘ona latou momoli ai lea o taulaga, ‘ina ‘ua mavae atu o tausaga e lua ma ‘ua latou tutu o molī ma momoli le mea manogi, ‘atoa ma areto e laulauina i luma.
4. ‘Ua uma mea ia, ‘ona latou punonou to‘ele lea, o ‘ai‘oi atu ai i le Ali‘i, ‘ia ‘aua ne‘i toe tu‘uina i latou e pa‘u‘ū i ni mala tetele fa‘apea; ‘ae ‘āfai ‘ua o‘o ‘ina pa‘u‘ū i latou i le agasala, ‘ia fa‘amamā teisi lana a‘oa‘iga ‘iā te i latou, ‘ae ‘aua ne‘i tu‘uina atu i latou i tagata sauā ma le fāifai i le Atua.
5. A o le aso lava na fa‘aleagaina ai le malumalu e tagata nu‘u ‘ese, o le aso luasefulu ma le lima o le masina o Kaseleu, o le aso ma le masina fo‘i lea na faia ai le fa‘amamāga o le malumalu.
6. Ma ‘ua latou fa‘amamaluina ma le fiafia i aso e valu e pei ‘ona faia i aso o fale apitaga, o manatu e i latou e le‘i leva ni aso talu ‘ona latou fa‘amamalu i le aso o fale apitaga i ana o mauga, e pei lava o manu ‘aivao.
7. O le mea fo‘i lea sa latou ‘ave ai ni laula‘au ma ni lauvao ma ni laupama e fa‘aaloalo a‘i i lē ‘ua na ta‘ita‘iina i latou ma le manuia i le fa‘amamāina o lona malumalu.
8. Ma ‘ua latou fa‘atonu atu, i se tulafono ma se poloa‘iga fa‘asalalau, i le nu‘u ‘atoa o tagata Iutaia ‘ia fa‘amamaluina o aso lava ia i tausaga ta‘itasi uma.
9. Ma ‘ua fa‘apea lava ‘ona fa‘amavae ma le olaga o Atioko, o lē ta‘ua le Mamalu.
10. O le a matou tala atu nei o mea na faia e Eupato, le atali‘i o Atioko le amio leaga, o fai fa‘apu‘upu‘u le tala i mala ‘ua tutupu i tau‘a.
11. Auā, na pule o le ali‘i nei i le mālō, ‘ona ia tofia lea ma pule i mea tau le mālō o le tagata ‘ua igoa ‘iā Lusia, o le ta‘ita‘i ‘au o le itūtau‘a o Foinie ma Suria.
12. Auā o Tulomaio, o lē ta‘ua o Makarona, sa loto e tausi pea i le mea tonu i le fa‘afeagai ma tagata Iutaia, ‘ae maise ‘ona ‘ua fa‘asauāina fua lava i latou ma ‘ua fia tausi ‘iā te i latou ma le filemū.
13. O le mea lea na molia ai o ia i luma o Eupato e ana uō; ‘ua fa‘alogo so‘o fo‘i o ia ‘ua ta‘ua o ia o le fa‘alata, ‘ona ‘ua tu‘ulafoa‘iina e ia le motu o Kuperu sa tu‘uina mai i lana tausiga e Filometo, ma ‘ua ‘au o ia fa‘atasi ma Atioko Epifano; a ‘ua lē toe lotogatasi fo‘i ma ia, ‘ona fa‘ai‘u lea o lona ola i le inu i se vai ‘o‘ona.
14. A o Korekia, na ‘avea ma pule o itūmālō ia, sa fai lana itūtau‘a o tagata nu‘u ‘ese, sa tau le tau‘a ma tagata Iutaia i aso faiso‘o.
15. O tagata Itumaia fo‘i sa nonofo i latou i ‘olo malolosi, sa tali ai e i latou o ē sa tuli‘esea mai Ierusalema ma taumafai pea ‘ona tau ai le tau‘a.