18. O le a matou faia, i le aso e luasefulu ma le lima o le masina o Kaseleu, le aso o le fa‘amamāina o le malumalu, o lea ‘ua matou manatu e tatau ‘ona fa‘ailoa atu ‘iā te ‘outou, ‘ina ‘ia faia fo‘i e ‘outou le aso o fale apitaga ma le aso o le afi na tu‘uina ifo i le itūlā na osia ai taulaga e Neemia, ‘ina ‘ua atiina a‘e le malumalu ma le fatafaitaulaga.
19. Auā o aso na ta‘ita‘iina ai o tatou tamā i Peresia, na tago ai o ositaulaga sa ‘au‘auna i le Atua i ona po ia i le afi o le fatafaitaulaga ma ‘ua latou natia fa‘alilolilo i le vaimauga sa i ai le vai‘eli maulalo ‘ua lē sua ma ‘ua latou teuina ai le afi, ‘ua lē iloa lava e se tasi le mea ‘ua i ai.
20. A ‘ua mavae atu tausaga e tele ma ‘ua finagalo le Atua ‘ia ‘auina mai Neemia e le tupu o Peresia, ‘ona ‘auina atu lea e ia o fānau a atali‘i o ositaulaga ia na latou natia le afi, ‘ia latou sā‘ilia mai; ‘ae tusa ma la latou fa‘aaliga ‘iā i matou, ‘ua latou lē maua lava se afi, a o le vai to‘a.
21. Ma ‘ua na poloa‘i atu ‘iā te i latou ‘ia latou utu le vai ma ‘aumai ‘iā te ia.
22. ‘Ua faia lea mea ma ‘ua o‘o i le itū aso ‘ua pupula ai le lā, sa mua‘i ufitia i le ao, ‘ona mū ai lea o le afi tele, ‘ua taufaiofo ai tagata uma.
23. ‘Ae sa fai tatalo o ositaulaga uma, a o mū le taulaga; ‘ua amata e Ionatana, ‘ae tali e isi ositaulaga uma.
24. A ‘ua fa‘apea ane le tatalo a Neemia:“Le Ali‘i e, le Atua, o oe na faia ai mea uma, o oe lē mata‘utia ma le mamana, o le amiotonu ma le agaalofa, ‘ua na o oe o le tupu agaalofa.
25. ‘Ua na o oe e matamau, na o oe o le amiotonu ma le mamana ma le fa‘avavau, na e lavea‘iina Isaraelu a‘i mea leaga uma, na e ‘avea o matou tamā mou tagata filifilia ma ‘ua e fa‘apa‘iaina i latou.
26. ‘Ia e talia lenei taulaga mo lou nu‘u ‘atoa uma o Isaraelu; ‘ia e tausi i lona tofi ma ‘ia e fa‘apa‘ia ‘iā te i latou.
27. ‘Ia e fa‘apotopotoina o ē ‘ua ta‘ape‘ape o le nu‘u, ‘ia e lavea‘iina o ē ‘ua fa‘apologaina e nu‘u ‘ese, ‘ia e silasila i ē tauemuina ma ē ‘inosia, ‘ina ‘ia iloa ai e nu‘u ‘ese o oe lo matou Atua.
28. ‘Ia e fa‘atigā i ē fa‘asauā ‘iā i matou ma ‘ua tauemu ‘iā i matou i lo latou fa‘amaualuga.
29. ‘Ia e fa‘atumauina lou nu‘u i lou lau‘ele‘ele pa‘ia, e pei ‘ona ta‘u mai e Mose.”
30. A o le ‘au ositaulaga sa latou lagi pese se‘ia o‘o ‘ina māe‘a le taulaga.
31. A ‘ua uma le taulaga, ‘ona poloa‘i lea o Neemia ‘ia sasa‘a le vai ‘ua totoe i ni ma‘a tetele.
32. ‘Ua faia lea, ‘ona mū lea le afi i ma‘a; ma ‘ua fa‘aumatia le vai i le malamalama mai i le fatafaitaulaga na suluia ai.
33. ‘Ua salalau lea tala, ‘ona tala‘iina lea i le tupu o Peresia ‘ua maua le vai i le mea na natia ai le afi e ositaulaga na fa‘aaunu‘ua ma ‘ua fa‘amamāina ai o taulaga e Neemia ma i latou sa fa‘atasi ma ia.
34. A ‘ua mafaufau i ai le tupu ma ‘ua su‘esu‘e fa‘alelei i ai, ‘ona ati a‘e ai lea se malumalu, ‘ia fa‘amaonia ai le mea ‘ua tupu.
35. ‘Ua uma ‘ona fa‘amaonia, ‘ona foa‘i lea e ia ni ‘oloa e tele i le ‘au ositaulaga ma ni mea alofa ‘ese‘ese, sa tago i ai lona lima ma avatu ‘iā te i latou.
36. A ‘ua fa‘aigoa e Neemia le mea lenā o “Nefetara,” o lona uiga o le fa‘amamāga; a ‘ua fa‘aigoaina ‘iā Nefi e ni isi e to‘atele.