6. ‘Ona tali atu ai lea o Solomona, “Na e alofa tele i lau ‘au‘auna o lo‘u tamā o Tavita, ‘ina ‘ua savali o ia i ou luma ma le fa‘amaoni ma le amiotonu, i le ma le loto sa‘o i ou luma; ‘ua e tausia fo‘i mōna lenei alofa tele ‘ua e foa‘iina ‘iā te ia le atali‘i e nofo i lona nofoāli‘i, e fa‘apei ‘ona fai i le aso nei.
7. O lenei, le ALI‘I e, lo‘u Atua, ‘ua e faia lau ‘au‘auna ma tupu, o le sui o lo‘u tamā o Tavita; o a‘u fo‘i o le tamaitiiti, ‘ou te lē iloa ‘ona ulufafo ma ulufale.
8. O lau ‘au‘auna fo‘i o lo‘o i luma o lou nu‘u ‘ua e filifilia, o le nu‘u tele, e le masino, e lē mafaitaulia, auā e to‘atele lava.
9. O lea ‘ia e foa‘i mai ai i lau ‘au‘auna le loto matala ‘ina ‘ia fa‘amasino e ia i lou nu‘u ma ‘ia masino ai i le lelei ma le leaga, auā po o ai na te mafaia ‘ona fa‘amasino i lou nu‘u nei ‘ua matuā to‘atele.”
10. ‘Ua lelei lana ‘upu i le Ali‘i, ‘ina ‘ua fa‘atoga e Solomona i lenā mea.
11. ‘Ona tali mai ai lea o le Atua ‘iā te ia, “‘Ua e fa‘atoga mai i lenei mea, a ‘ua e lē fa‘atoga mai i le ola tulu‘i mo oe, ‘ua e lē fa‘atoga fo‘i mo oe ‘ia mau‘oa, ‘ua e lē fa‘atoga mai fo‘i ‘ia oti ē ‘ua ita mai ‘iā te oe; a ‘ua e fa‘atoga mo oe le loto matala ‘ia e iloa ai ‘ona fa‘amasino,
12. fa‘auta, ‘ua ‘ou faia e fa‘apei ‘ona e fai mai ai; fa‘auta, ‘ua ‘ou foa‘iina atu ‘iā te oe le loto poto ma le matala; sa leai se tasi na muamua ‘iā te oe e tusa ma oe, e lē toe tupu mai fo‘i se tasi e mulimuli ‘iā te oe e tusa ma oe.
13. ‘Ua ‘ou foa‘iina atu fo‘i ‘iā te oe ‘atoa ma mea ‘ua e lē fa‘atoga mai ai, o le ‘oloa ‘atoa ma le mamalu; ‘ina ‘ia leai se tupu e tusa ma oe i ou aso uma.
14. ‘Āfai fo‘i ‘e te savali i o‘u ala ma e tausi i a‘u tulafono ma a‘u poloa‘iga, e pei ‘ona savali ai o lou tamā o Tavita, ‘ou te fa‘afualoaina ou aso.”
15. ‘Ona ala mai lea o Solomona; fa‘auta, o le miti. ‘Ua alu atu o ia i Ierusalema, ‘ona tu lea i luma o le ‘atola‘au o le feagaiga a le ALI‘I; ‘ua avatua fo‘i e ia o taulaga mū, ma ia faia taulaga fa‘afetai; ‘ua ia saunia fo‘i le tausamiga mo ana ‘au‘auna uma.
16. ‘Ona ō mai ai lea i le tupu o fafine talitane e to‘alua, ‘ua la tutū i ona luma.
17. ‘Ua fai mai a le tasi fafine, “Le ali‘i e, ma te mau ma lenei fafine i le fale e tasi; na ‘ou fānau fo‘i, sa ma i ai fo‘i ma ia i le fale.
18. ‘Ua o‘o fo‘i i le po tolu talu ‘ona ‘ou fānau, ‘ona fānau ai lea o lenei fafine, sa mā fa‘atasi, sa leai se tagata ‘ese ‘iā te i mā‘ua i le fale, ‘ua na o i mā‘ua lava sa i le fale.
19. ‘Ua oti fo‘i le tama a lenei fafine i le po; auā ‘ua tatao o ia ‘iā te ia.
20. ‘Ona tula‘i lea o ia i le tulua o po ma ao, ‘ua ‘ave ‘ese la‘u tama sa ‘iā te a‘u, a o moe lau ‘au‘auna fafine, ‘ua ia fa‘ata‘oto ‘iā te ia i lona fatafata, a ‘ua fa‘ata‘oto mai e ia lana tama ‘ua oti i lo‘u fatafata.
21. Na ‘ou nofo i luga i le taeao e fa‘asusu i la‘u tama, fa‘auta, ‘ua oti ia; ‘ua ‘ou matuā matamata i ai i le taeao, fa‘auta, e lē o la‘u tama tane na ‘ou fānaua.”
22. ‘Ona fai mai lea o le isi fafine, “E leai, a o lo‘o ola o la‘u tama lea, a o lē ‘ua oti o lau tama lea.”A ‘ua fai mai le tasi, “E leai; a o lē ‘ua oti o lau tama lea, a o lē ‘ua ola o la‘u tama lea;” ‘ua fa‘apea ‘ona la tautalatala i luma o le tupu.
23. ‘Ona fai atu lea o le tupu, “‘Ua fai mai le tasi, ‘O lē ‘ua ola o la‘u tama lea, a o lē ‘ua oti o lau tama lea;’ a ‘ua fai mai le isi, ‘E leai; a o lē ‘ua oti o lau tama lea, a o lē ‘ua ola o la‘u tama lea.’”
24. ‘Ona fai ane lea o le tupu, “‘Inā ‘aumaia se pelu.” ‘Ona latou ‘aumai lea o le pelu i luma o le tupu.