1. Fa‘auta fo‘i, ‘ua sau le tagata o le Atua, i le afioga a le ALI‘I mai Iuta i Peteli; o lo‘o tu mai fo‘i Ierepoamo i tafatafa o le fatafaitaulaga e fa‘amū ai mea manogi.
2. ‘Ona ‘alaga atu lea o ia i le fatafaitaulaga i le afioga a le ALI‘I, ‘ua ia fa‘apea atu, “Le fatafaitaulaga e, le fatafaitaulaga e, o lo‘o fa‘apea ‘ona fetalai mai o le ALI‘I, ‘Fa‘auta o le a fānau mai le tama i le ‘āiga o Tavita, e igoa ia Iosia, na te fai taulaga i luga ‘iā te oe i le ‘au ositaulaga o mea maualuluga, o ē fa‘amū mea manogi i luga ‘iā te oe, e susunuina fo‘i ivi o tagata i luga ‘iā te oe.’”