12. E tofi fo‘i e ia ‘iā te i latou e pule i ‘au e ta‘ito‘aafe ma pule i ‘au e ta‘ito‘alimagafulu; ma ‘ia suatia lona fanua, ma selesele i lana seleselegāsaito; latou te gaosi fo‘i ana ‘au‘upega o le tau‘a, ma mea e teu ai ona kariota.
13. O ‘outou afafine fo‘i, e ‘ave ai latou e ia e fai mea manogi, e fai umu ma fai areto.
14. O ‘outou fanua fo‘i ma ‘outou tōvine, ma ‘outou tōolive e sili ‘ona lelei, e ‘ave e ia, ma foa‘i atu i ana ‘au‘auna.
15. O a ‘outou fua ma ‘outou tōvine, e ‘ave mea e sefulua‘i ma foa‘i atu i ana ‘au‘auna sili ma ana ‘au‘auna.
16. O a ‘outou ‘au‘auna tane ma a ‘outou ‘au‘auna fafine, ma o ‘outou taulele‘a ‘aulelei, ‘atoa fo‘i ma ‘outou asini, e ‘ave e ia e fai a‘i lana galuega.
17. E ‘ave mea e sefulua‘i a ‘outou mamoe; o ‘outou fo‘i, e fai ‘outou ma ana ‘au‘auna.