16. O le ipu o le fa‘afetai o tatou o fa‘afetai ai, e lē o le ‘auai fa‘atasi ‘ea lea ma le toto o Keriso? O le areto tatou te tofitofi ai, e lē o le auai fa‘atasi ‘ea lea ma le tino o Keriso?
17. ‘Ona ‘ua tasi lava le areto o lea ‘ua tino e tasi ai i tatou; e ui ‘ina to‘atele, auā ‘ua tofusia i tatou uma i le areto e tasi.
18. Silasila i tagata Isaraelu i la le tino; o ē o ‘a‘ai taulaga, ‘ua lē tofu ‘ea i tufa‘aga fa‘atasi ma le fatafaitaulaga.
19. Se a fo‘i ‘ou te fai atu ai? O se mea aogā ‘ea le tupua? Po o se mea aogā le mea ‘ua fasia mo tupua?
20. E leai, a o mea ‘ua fasia e nu‘u ‘ese, ‘ua fasia e i latou mo temoni, ‘ae lē o le Atua; ‘ou te lē loto fo‘i ‘ina ‘ia ‘outou mafuta fa‘atasi ma temoni.
21. Tou te lē mafaia ‘ona inu i le ipu a le Ali‘i ‘atoa ma le ipu a temoni; tou te lē mafaia ‘ona fa‘atofutofusia i le la‘o‘ai a le Ali‘i ‘atoa ma le la‘o‘ai a temoni.
22. Tatou te fa‘a‘ono‘ono ‘ea i le Ali‘i? ‘Ua sili ‘ea lo tatou malosi i lona?
23. “‘Ua tataga mea uma ‘iā te a‘u,” a ‘ua lē aogā mea uma; “‘ua tataga mea uma ‘iā te a‘u,” a ‘ua lē fa‘amafanafana mea uma.
24. ‘Aua le sā‘ili se tasi i lona lava lelei, a ‘ia ta‘itasi ma sā‘ili i le lelei o le isi.
25. O mea uma ‘ua fa‘atauina i le mea e fa‘atau ai ‘a‘ano o manu, ‘ia ‘outou ‘a‘ai ai; ‘aua lava le fesili ‘ona o le loto fuatia ifo;
26. auā “o le lalolagi e o le Ali‘i lea, ‘atoa ma mea ‘ua tumu ai.”
27. ‘Āfai fo‘i e vala‘auina ‘outou e se tasi o ē lē fa‘atuatua, ma ‘outou fia ō atu ai, ‘ia ‘outou ‘a‘ai i mea uma ‘ua laulauina mai ‘iā te ‘outou; ‘aua lava le fesili ‘ona o le loto fuatia ifo.
28. ‘Ae ‘āfai e fa‘apea mai se tasi ‘iā te ‘outou, “O le mea nei ‘ua fasia mo le tupua;” ‘aua tou te ‘a‘ai ai, ‘ona o lē na fa‘aali mai ai, auā fo‘i o le loto fuatia ifo.
29. O le loto fuatia ifo ‘ou te fai atu ai, e lē o lo‘u, a o lona.Auā se a le mea e fa‘amasinoina ai lo‘u sa‘olotoga i le loto fuatia ifo o le tasi?
30. O a‘u fo‘i, ‘āfai ‘ou te ‘ai ma le fa‘afetai, se a le mea ‘ua ‘upuleagaina ai a‘u ‘ona o le mea ‘ua ‘ou fa‘afetai atu ai?
31. O lenei, pe tou te ‘a‘ai, pe tou te inu, po o se tasi mea tou te faia, ‘ia ‘outou faia mea uma lava ‘ia vi‘ia ai le Atua.
32. ‘Aua le ‘avea ‘outou ma mea e tautevateva ai Iutaia, po o Eleni, po o le ekalesia a le Atua;
33. fa‘apei o a‘u nei fo‘i, ‘ou te fa‘afiafia atu i tagata uma i mea uma lava, o lo‘o lē sā‘ilia e a‘u so‘u lava lelei, a o le to‘atele, ‘ina ‘ia fa‘aolaina ai i latou.