19. И сотвориша ученицы, якоже повеле им Иисус, и уготоваша пасху.
20. Вечеру же бывшу, возлежаше со обеманадесяте ученикома:
21. и ядущым им, рече: аминь глаголю вам, яко един от вас предаст мя.
22. И скорбяще зело, начаша глаголати ему един кийждо их: еда аз есмь, Господи?
23. Он же отвещав рече: омочивый со мною в солило руку, той мя предаст:
24. Сын убо Человеческий идет, якоже есть писано о нем: горе же человеку тому, имже Сын Человеческий предастся: добро бы было ему, аще не бы родился человек той.
25. Отвещав же иуда предаяй его, рече: еда аз есмь, равви? глагола ему: ты рекл еси.
26. Ядущым же им, приемь Иисус хлеб и благословив преломи, и даяше учеником, и рече: приимите, ядите: сие есть тело мое.
27. И приемь чашу и хвалу воздав, даде им, глаголя: пийте от нея вси: