32. Тогда призвав его господин его, глагола ему: рабе лукавый, весь долг он отпустих тебе, понеже умолил мя еси:
33. не подобаше ли и тебе помиловати клеврета твоего, якоже и аз тя помиловах?
34. И прогневався господь его, предаде его мучителем, дондеже воздаст весь долг свой.
35. Тако и Отец мой небесный сотворит вам, аще не отпустите кийждо брату своему от сердец ваших прегрешения их.