33. Егда же хотяше день быти, моляше павел всех, да приимут пищу, глаголя: четыренадесятый днесь день ждуще, не ядше пребываете, ничтоже вкусивше:
34. темже молю вас прияти пищу, се бо к вашему спасению есть: ни единому бо от вас влас главы отпадет.
35. Рек же сия и приемь хлеб, благодари Бога пред всеми и преломль начат ясти.
36. Благонадежни же бывше вси, и тии прияша пищу:
37. бе же в корабли всех душ двесте седмьдесят и шесть.
38. Насыщшеся же брашна, облегчиша корабль, изметающе пшеницу в море.