4. For blod frå oksar og bukkar kan umogleg ta bort synder.
5. Difor seier Kristus når han stig inn i verda: Slaktoffer og offergåve ville du ikkje ha, men ein kropp laga du til meg;
6. brennoffer og syndoffer hadde du inga glede i.
7. Då sa eg: Sjå, her kjem eg for å gjera din vilje, Gud. I bokrullen er det skrive om meg.
8. Først seier han: Slaktoffer og offergåver, brennoffer og syndoffer ville du ikkje ha og hadde du ikkje glede i, endå det er slike offer som blir borne fram etter lova.
9. Deretter seier han: Sjå, her kjem eg for å gjera din vilje. Han opphevar det første så han kan setja det andre i verk.
10. På grunn av denne viljen er vi helga ved at Jesu Kristi kropp vart boren fram som offer éin gong for alle.
11. Alle prestar står dagleg og gjer teneste og ber gong på gong fram dei same offer, som aldri kan ta bort synder.
12. Men Jesus har for alltid bore fram eit einaste offer for synder og sett seg ved Guds høgre hand.
13. No ventar han berre på at fiendane hans skal leggjast ned som skammel for føtene hans.
14. For med ei einaste offergåve har han for alltid gjort dei som blir helga, fullkomne.
15. Den heilage ande vitnar òg for oss om dette. For først seier han:
16. Dette er pakta eg vil gjera med dei i dagar som kjem, seier Herren: Eg vil leggja mine bod i hjartet deira og skriva dei i sinnet deira.
17. Og så: Eg vil ikkje lenger hugsa syndene deira og all uretten deira.
18. Men der syndene er tilgjevne, trengst det ikkje lenger noko offer for synd.
19. Så har vi då, sysken, frimod ved Jesu blod til å gå inn i heilagdomen,
20. dit han har innvigd ein ny og levande veg for oss gjennom forhenget, som er kroppen hans.
21. Og sidan vi har ein så stor prest over Guds hus,
22. så lat oss stiga fram med ærleg hjarte og full visse i trua, med hjartet reinsa for vondt samvit og kroppen bada i reint vatn.
23. Lat oss halda urokkeleg fast på vedkjenninga av vona, for han som gav lovnaden, er trufast.