5. ကိုယ်တော်ရှင်သည်ကျွန်တော်မျိုးအားကယ်တင်တော်မူသောဘုရားဖြစ်တော်မူသည် ဖြစ်၍ကျွန်တော်မျိုးအားကိုယ်တော်ရှင်၏သမ္မာတရားတော်အတိုင်းပြုမူကျင့်ကြံ တတ်ရန် သွန်သင်တော်မူပါ။ကျွန်တော်မျိုးသည်ကိုယ်တော်ရှင်ကို အစဉ်ကိုးစားလျက်နေပါ၏။
6. အို ထာဝရဘုရား၊ရှေးကာလမှစ၍ကိုယ်တော်ရှင်ပြတော် မူသည့်ကရုဏာတော်နှင့်ခိုင်မြဲသောမေတ္တာတော် တို့ကို အောက်မေ့သတိရတော်မူပါ။
7. အသက်ပျိုရွယ်စဉ်အခါကကျွန်တော်မျိုးကူးလွန်ခဲ့သည့်အပြစ်များနှင့် အမှားအယွင်းများကိုဖြေလွှတ်တော်မူပါ။ကိုယ်တော်ရှင်သည်ခိုင်မြဲသောမေတ္တာရှိတော်မူ၍ ကောင်းမြတ်တော်မူသည်နှင့်အညီကျွန်တော်မျိုးအားအောက်မေ့သတိရတော်မူပါ။
8. ထာဝရဘုရားသည်ကောင်းမြတ် ဖြောင့်မှန်တော်မူသဖြင့်အပြစ်ကူးသူတို့အားလျှောက်လိုက်သင့်သည် လမ်းကိုပြညွှန်တော်မူ၏။
9. စိတ်နှလုံးနှိမ့်ချသူတို့အားလမ်းမှန်သို့ ပို့ဆောင်တော်မူလျက်ကိုယ်တော်၏အလိုတော်ကိုသွန်သင်တော်မူ၏။
10. ပဋိညာဉ်တော်နှင့်ပညတ်တော်တို့ကို စောင့်ထိန်းသူအပေါင်းတို့အားကိုယ်တော်သည်မေတ္တာနှင့်လည်းကောင်း၊ သစ္စာနှင့်လည်းကောင်းလမ်းပြပို့ဆောင် တော်မူ၏။
11. အို ထာဝရဘုရား၊ကျွန်တော်မျိုး၏အပြစ်တို့သည်များလှပါ၏။သို့ဖြစ်၍ကိုယ်တော်ရှင်၏ကတိတော်ကိုတည်စေတော်မူလျက်ကျွန်တော်မျိုး၏ အပြစ်များကိုဖြေလွှတ်တော်မူပါ။
12. ထာဝရဘုရားကိုကြောက်ရွံ့ရိုသေသောသူ တို့သည်မိမိတို့လျှောက်အပ်သည့်လမ်းစဉ်ကို ကိုယ်တော်၏ထံမှသင်ယူကြလိမ့်မည်။